ភ្នំពេញ៖ អ្នកជិះម៉ូតូឌុបគ្នាចំនួន៣នាក់ ត្រូវបានរថយន្តធុនធំសណ្តោងកុងតឺន័រ បុកនិងកិន    បណ្តាលឱ្យស្លាប់ កាលពីវេលាម៉ោង៣ និង៤០នាទីទៀបភ្លឺ ថ្ងៃទី១១ ខែមេសា ឆ្នាំ២០២២ ស្ថិតនៅតាមបណ្តោយផ្លូវណតប្រ៊ីត ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។

របាយការណ៍របស់សមត្ថកិច្ចបានឱ្យដឹងថា អ្នកស្លាប់ទាំង៣នាក់ មានឈ្មោះ គង់ សុធារិទ្ធ អាយុ២៤ឆ្នាំ ,ឈ្មោះ នៅ ប៊ុនណា អាយុ២៣ឆ្នាំ និងឈ្មោះ អំ កំពូល អាយុ២៣ឆ្នាំ។

ប្រភពពីកន្លែងកើតហេតុបានឱ្យដឹងថា មុនកើតហេតុគេបានឃើញអ្នករងគ្រោះទាំង៣នាក់ បើកម៉ូតូម៉ាកស៊ុយហ្ស៊ុយគីស្មាស់វី ពណ៌ខ្មៅ ពាក់ស្លាកលេខ ភ្នំពេញ1CB-8957 ជិះឌុបគ្នាតាមបណ្តោយផ្លូវលេខ២០០៤ ក្នុងទិសដៅពីកើតទៅលិច លុះមកដល់ចំណុចកើតហេតុស្រាប់តែគេឃើញបុរសម្នាក់បានបើករថយន្តសណ្តោងទូកុងតឺន័រ មិនចាំស្លាកលេខ តាមបណ្តោយផ្លូវណតប្រ៊ីត ក្នុងទិសដៅពីត្បូងទៅជើងយ៉ាងលឿន ជ្រុលទៅបុកម៉ូតូពេញទំហឹង រួចកិនពីលើ   បណ្តាលឱ្យបុរស៣នាក់ស្លាប់នៅកន្លែងកើតហេតុ រីឯរថយន្តកុងតឺន័រ ក៏បន្ថែមល្បឿនបើករត់គេចខ្លួនបាត់តែម្តង។

បច្ចុប្បន្នសមត្ថកិច្ចកំពុងធ្វើការស្រាវជ្រាវដើម្បីស្វែងរកអ្នកបើករថយន្តបង្កហេតុយកមកចាត់ការបន្តតាមនីតិវិធី និហបានប្រគល់សពឱ្យទៅក្រុមគ្រួសារយកទៅធ្វើបុណ្យតាមប្រពៃណី៕