ភ្នំពេញ៖ ខេត្តចំនួន៤ ត្រូវបានរាជរដ្ឋាភិបាលកម្ពុជា សម្រេចជ្រើសរើសសម្រាប់ជាគោលដៅលើកលែងកាតព្វកិច្ចពាក់ម៉ាស់ ប៉ុន្តែនៅតែប្រុងប្រយ័ត្នខ្ពស់ ដើម្បីការពារការឆ្លងរាលដាលជំងឺកូវីដ-១៩។
សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានប្រកាសថា ខេត្តទាំង៤ ដែលបានដាក់ចេញជាគោលដៅលើកលែងកាតព្វកិច្ចពាក់ម៉ាស់ រួមមាន៖ ខេត្ត រតនគីរី មណ្ឌលគីរី ស្ទឹងត្រែង និងខេត្តព្រះវិហារ។
សម្ដេចតេជោ បានបញ្ជាក់ថា ទោះបីក្នុងខេត្តទាំង៤នេះ មិនតម្រូវឲ្យពាក់ម៉ាស់មែន ប៉ុន្តែទុកលទ្ធភាពជូនដល់ប្រជាជនជាអ្នកសម្រេចចិត្តដោយខ្លួនឯងថា តើត្រូវពាក់ម៉ាស់ ឬក៏មិនគួរពាក់នៅក្នុងខេត្តទាំង៤នេះ។
សម្តេចនាយករដ្ឋមន្រ្តីកម្ពុជា បានលើកឡើងដែរថា ក្រៅពីស្ថិតនៅក្នុងខេត្តទាំង៤ អ្នកទៅពីកន្លែងផ្សេងចូលទៅទាំង៤នេះ មិនពាក់ម៉ាស់ក៏បានដែរ ក៏ប៉ុន្តែនៅពេលដែលចេញផុតពីខេត្តទាំងនេះ ហើយចូលទៅកាន់ដែនដីខេត្តផ្សេង ចាំបាច់ត្រូវតែពាក់ម៉ាស់។
យ៉ាងណាក៏ដោយ សម្ដេចតេជោ ហ៊ុន សែន បានរំលឹកដល់អាជ្ញាធរក្នុងខេត្តទាំងបួន ត្រូវប្រុងប្រៀបអំពីវិធានការធ្វើតេស្តរហ័ស និងបានអំពាវនាវចំពោះប្រជាពលរដ្ឋត្រូវសហការណ៍ ហើយក្នុងករណីមានការសង្ស័យត្រូវធ្វើតេស្តបន្ទាន់៕
