ភ្នំពេញ៖ ប្រទេសកម្ពុជា បានឡើងមកឈរនៅលេខរៀងទី២ ក្នុងនាមជាប្រទេសដែលមានសមត្ថភាពស្ដារខ្លួនងើបចេញពី COVID-19 លឿនជាងគេ នៅលើពិភពលោក។ នេះបើតាមការដកស្រង់ចេញផ្សាយពីសារព័ត៌មាន Nikkei នៅថ្ងៃអាទិត្យ ទី១០ ខែមេសា ឆ្នាំ២០២២។
នៅក្នុងតារាងវាយតម្លៃរបស់សារព័ត៌មានជប៉ុន Nikkei បានឱ្យដឹងថា ប្រទេសដែលឈរនៅលេខរៀងទី១ ដែលមានសមត្ថភាពស្ដារខ្លួនងើបចេញពី COVID-19 លឿនជាងគេនៅលើពិភពលោក គឺអេមីរ៉ាតអារ៉ាប់រួមដោយទទួលបាន ៨៥.៥ពិន្ទុ ខណៈកម្ពុជា ឈរនៅលេខរៀងទី២ មាន ៨០.៥ពិន្ទុ។
សូមបញ្ជាក់ថា គិតត្រឹមថ្ងៃទី៩ ខែមេសា ឆ្នាំ២០២២ កម្ពុជាមានអ្នកឆ្លងជំងឺកូវីដ-១៩ សរុបចំនួន១៣៥៩១៤នាក់ និងមានករណីស្លាប់ ចំនួន៣០៥៥នាក់។ ជាមួយគ្នានេះ កម្ពុជាសម្រេចបាននូវលទ្ធផលចាក់វ៉ាក់សាំង ប្រមាណ៩២,៧៨ភាគរយ បើធៀបនឹងចំនួនប្រជាជនសរុប១៦លាននាក់។
នាពេលថ្មីៗនេះ រាជរដ្ឋាភិបាលកម្ពុជា បានសម្រេចលុបចោលការតម្រូវឱ្យធ្វើតេស្តតាមម៉ាស៊ីនធំ PCR សម្រាប់អ្នកដំណើរមកពីបរទេសរយៈពេល ៧២ម៉ោង មុនពេលមកដល់កម្ពុជា និងការតម្រូវឱ្យធ្វើតេស្តរហ័សនៅពេលមកដល់កម្ពុជា ព្រមទាំងអនុញ្ញាតឱ្យបើកដំណើរការឡើងវិញនូវការផ្តល់ទិដ្ឋាការពេលមកដល់សម្រាប់អ្នកដំណើរអន្តរជាតិទាំងអស់ រួមមានទាំងតាមផ្លូវអាកាស ផ្លូវគោក និងផ្លូវទឹក ផងដែរ៕
