ភ្នំពេញ៖ កិច្ចប្រជុំស្វែងរកដំណោះស្រាយវិវាទការងាររវាងអតីតបុគ្គលិក ជាមួយក្រុមហ៊ុនណាហ្គាវើលដ៍ នៅពុំទាន់មានសញ្ញាវិជ្ជមាននៅឡើយទេ ប៉ុន្តែក្រសួងការងារ និងបណ្តុះបណ្តាលវិជ្ជាជីវៈ បានកំណត់ថ្ងៃប្រជុំបន្តទៀត ដើម្បីស្វែងរកលទ្ឋភាពបញ្ចប់វិវាទនេះ។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ក្រោយពីការពិភាក្សាគ្នាយ៉ាងផុសផុល ភាគីទាំងពីរ នៅមិនទាន់ឈានដល់ចំណុចព្រមព្រៀងគ្នានៅឡើយទេ ប៉ុន្តែកំណត់កាលបរិច្ឆេទប្រជុំបន្ទាប់នៅថ្ងៃព្រហស្បតិ៍ ទី២១ ខែមេសា ឆ្នាំ២០២២ វេលាម៉ោង ១៤:៣០នាទី ដើម្បីឱ្យភាគីទាំងពីរមានឱកាសពិចារណាឡើងវិញ អំពីលទ្ធភាពនៃការសម្បទានគ្នាទៅវិញទៅមកដែលអាច ឈានទៅបញ្ចប់វិវាទនេះ។
ក្រសួងការងារ និងបណ្តុះបណ្តាលវិជ្ជាជីវៈ បានដែរថា ទោះបីជាមិនទាន់មានការឯកភាពគ្នា ក៏ក្រសួងក៏នឹងបន្តខិតខំធ្វើការសម្របសម្រួល និងកំណត់កាលបរិច្ឆេទប្រជុំបន្តបន្ទាប់ទៀត ស្របតាមតួនាទីដែលកំណត់ដោយច្បាប់ ក៏ដូចជាការទាមទាររបស់គូភាគី។
សូមបញ្ជាក់ដែរថា ការតវ៉ារបស់អតីតបុគ្គលិក ក្រុមហ៊ុនណាហ្គាវើលដ៍ បានកើតឡើងក្រោយពីក្រុមហ៊ុន បានកាត់បុគ្គលិក ចំនួន៣៦៥នាក់ ចេញពីការងារនៅអំឡុងដើមឆ្នាំ និងពាក់កណ្តាលឆ្នាំ២០២១កន្លងទៅ។
ក្រុមហ៊ុនណាហ្គាវើល ធ្លាប់បានបញ្ជាក់ថា ការកាត់បន្ថយ និងបញ្ឈប់បុគ្គលិកមួយចំនួន គឺបន្ទាប់ពីក្រុមហ៊ុន បានជួបវិបត្តិដោយសារការរាតត្បាតជំងឺកូវីដ-១៩ ខណៈត្រឹមឆមាសទី១ ក្រុមហ៊ុន បានខាតបង់ថវិកាជាង៧០លានដុល្លារ៕
