ភ្នំពេញ៖ ឥទ្ឋិពលទ្រនង់សម្ពាធខ្ពស់ ( ចិន ) នឹងកើតឡើងចាប់ពីអំឡុងថ្ងៃទី៦ ដល់ថ្ងៃទី១២ ខែមេសា ឆ្នាំ២០២២ នឹងអាចធ្វើឱ្យមានភ្លៀងក្នុងកម្រិតខ្សោយទៅមធ្យមជាអន្លើ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម បានឱ្យដឹងថា នៅថ្ងៃទី៦ ដល់ថ្ងៃទី៩ ខែមេសា ឥទ្ធិពលទ្រនង់សម្ពាធខ្ពស់ ( ចិន ) នឹងកើតមានក្នុងកម្រិតពីខ្សោយទៅមធ្យម ហើយនៅថ្ងៃ១០-១២មេសា នឹងកើតមានឥទ្ធិពលពីកម្រិតសម្ពាធទាបខ្សោយ។
ក្រសួងឱ្យដឹងបន្តថា ស្ថានភាពបែបនេះ នឹងធ្វើឲ្យបណ្តាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមា ពី ២៣-២៦អង្សាសេ និងសីតុណ្ហភាពអតិបរមា ពី ៣៣-៣៦អង្សាសេ នឹងអាចមានភ្លៀងក្នុងកម្រិតខ្សោយទៅមធ្យមជាអន្លើ។
ក្រសួងឱ្យដឹងបន្តទៀតថា បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពអប្បបរមា មានពី ២៣-២៦អង្សាសេ និងសីតុណ្ហភាពអតិបរមា មានពី ៣៣-៣៦អង្សាសេ នឹងអាចមានភ្លៀងក្នុងកម្រិតខ្សោយទៅមធ្យមជាអន្លើ។
ដោយឡែកនៅតំបន់មាត់សមុទ្រ សីតុណ្ហភាពអប្បបរមា មានពី ២២-២៥អង្សាសេ និងសីតុណ្ហភាពអតិបរមា មានពី ៣០-៣២អង្សាសេ នឹងអាចមានភ្លៀងក្នុងកម្រិតខ្សោយទៅមធ្យមជាអន្លើ៕
