ភ្នំពេញ៖ បុរសជនបរទេសម្នាក់ បានរងរបួសធ្ងន់ ដោយសារការបាញ់ប្រហារមួយនៅកណ្តាលរាជធានីភ្នំពេញ នាព្រឹក ថ្ងៃទី០៤ ខែមេសា ឆ្នាំ២០២២ ត្រង់ចំណុចខុនដូមួយកន្លែងក្បែរអតីតខារ៉ាអូខេ អ៊ិចធូ ស្ថិតតាមបណ្ដោយផ្លូវលេខ៥៥ កែងផ្លូវលេខ២២២ ក្នុងមូលដ្ឋានសង្កាត់បឹងរាំង ខណ្ឌដូនពេញ។
ប្រភពពីកន្លែងកើតហេតុបានឱ្យដឹងថា ករណីនេះបានកើតឡើងនៅវេលាម៉ោង៧ព្រឹក និងមានការផ្ទុះអាវុធជាង១០គ្រាប់ បណ្តាលឱ្យបុរសជាជនបរទេសម្នាក់ រងរបួសធ្ងន់ និងត្រូវបានបញ្ជូនទៅសង្រ្គោះបន្ទាន់នៅមន្ទីរពេទ្យ។
ប្រភពបន្តថា នៅមុនពេលកើតហេតុគេឃើញមានជនជាតិបរទេសមួយក្រុមបានចុះពីខុនដូកើតហេតុ និងមានការឈ្លោះប្រកែកគ្នា រហូតឈានដល់ផ្ទុះអាវុធបណ្ដាលឱ្យមានរងរបួសហើយក្រុមដែលបាញ់ប្រហារបានឡើងរថយន្តគេចខ្លួនចេញពីកន្លែងកើតហេតុបាត់តែម្ដង។
ភ្លាមៗបន្ទាប់ពីមានការភ្ញាក់ផ្អើល សមត្ថកិច្ចបានចុះដល់ទីតាំងដើម្បីស្រាវជ្រាវ និងកំណត់អត្តសញ្ញាណជនសង្ស័យ ខណៈអ្នករងរបួសត្រូវបានបញ្ជូនទៅមន្ទីរពេទ្យកាល់ម៉ែត ដើម្បីសង្គ្រោះបន្ទាន់៕
