ភ្នំពេញ៖ រាជរដ្ឋាភិបាលកម្ពុជា កំពុងពិចារណាក្នុងការកែសម្រួលផ្លូវរថភ្លើង ដើម្បីបង្កភាពងាយស្រួលដល់ការធ្វើដំណើរ និងការដឹកជញ្ជូនបានឆាប់រហ័ស នៅក្នុងប្រទេស និងទៅកាន់ប្រទេសជិតខាង។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងក្នុងពិធីសម្ពោធដាក់ឱ្យប្រើប្រាស់ផ្លូវចំនួន៣៨ខ្សែ ក្នុងខេត្តសៀមរាប នាព្រឹកថ្ងៃចន្ទ ទី០៤ ខែមេសា ឆ្នាំ២០២២នេះថា សម្តេចបានឱ្យរដ្ឋមន្រ្តីក្រសួងសាធារណការ និងដឹកជញ្ជូន ពិចារណាលើកគម្រោង និងរកដៃគូរដើម្បីពិភាក្សាដោះស្រាយបញ្ហាខាងលើ។
សម្តេចតេជោ ហ៊ុន សែន បានចាត់ទុកប្រព័ន្ឋផ្លូវដែក ដែលមានស្រាប់ និងស្ថានភាពរថភ្លើងដែលមានល្បឿនយឺត នាពេលបច្ចុប្បន្ន គឺតាមមិនទាន់សភាពការណ៍ និងហួសសម័យ។
យ៉ាងណាក៏ដោយ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា ការពិចារណាកែសម្រួលផ្លូវដែកនេះ នឹងត្រូវធ្វើឡើងនៅលើផ្លូវចាស់ដដែល។
សូមបញ្ជាក់ថា កម្ពុជាមានខ្សែរថភ្លើងចំនួន២ទិស ពីក្រុងប៉ោយប៉ែត មករាជធានីភ្នំពេញ និងពីរាជធានីភ្នំពេញ ឆ្ពោះទៅកាន់ខេត្តព្រះសីហនុ៕
