សៀមរាប៖ នៅក្នុងឱកាសចុះពិនិត្យការដ្ឋានសាងសង់អាកាសយានដ្ឋានអន្តរជាតិសៀមរាបថ្មី ក្នុងស្រុកសូទ្រនិគម ខេត្តសៀមរាប នៅព្រឹកថ្ងៃទី៣ ខែមេសា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានថ្លែងថា កម្ពុជាមិនត្រូវការកងទ័ពបរទេសនោះទេ ប៉ុន្តែត្រូវការតែអ្នកទេសចរណ៍របរទេសតែប៉ុណ្ណោះ។

សម្តេចតេជោ ហ៊ុន សែន បានលើកឡើងថា ការធ្វើព្រលានយន្តហោះខេត្តសៀមរាប ក៏មិនមែនជាការពង្រឹងសមត្ថភាពយោធាចិន នៅកម្ពុជាដែរ ហើយកម្ពុជាក៏មិនល្ងង់រហូតទៅដល់ឱ្យទឹកដីក្លាយជាទីតាំងទ័ពបរទេសខុសពីរដ្ឋធម្មនុញ្ញនោះឡើយ។ 

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ទៀតថា តំបន់ក្បែរអាកាសយានដ្ឋានអន្តរជាតិសៀមរាបថ្មី នឹងក្លាយជាតំបន់ទីប្រជុំជន ហើយអាចជាទីក្រុងរណបថ្មីនាពេលអនាគត។

សូមបញ្ជាក់ថា អាកាសយានដ្ឋានថ្មី ក្នុងខេត្តសៀមរាបនេះ ស្ថិតនៅក្នុងឃុំតាយ៉ែក ស្រុកសូទ្រនិគម គ្រោងនឹងបញ្ចប់ ដោយឆ្លងកាត់ការត្រួតពិនិត្យរបស់ក្រុមបច្ចេកទេស និងអង្គភាពជំនាញ ឈានទៅបំពេញលក្ខខណ្ឌប្រតិបត្តិការរបស់អាកាសយានដ្ឋាន នាពាក់កណ្តាលខែមីនា ឆ្នាំ២០២៣។

អាកាសយានដ្ឋានថ្មីនេះ ស្ថិតក្នុងលំដាប់ 4E មានផ្លូវរត់ប្រវែង៣,៦០០ម៉ែត្រ ទទឹង ៤៥ម៉ែត្រ មាន៣៨ចំណតយន្តហោះ និងមានក្រឡាផ្ទៃស្ថានីយ អ្នកដំណើរជាង ៨ម៉ឺនម៉ែត្រក្រឡា ដែលអាចទទួលអ្នកដំណើរជាប្រចាំឆ្នាំប្រមាណជា ៧លាននាក់៕