ឧត្តរមានជ័យ ៖ អ្នកភូមិចំនួន៣នាក់ បានរងរបួសដោយសារការវាយប្រហារពីសំណាក់សត្វខ្ទីង១ក្បាល ក្នុងគ្រាដែលពួកគាត់កំពុងធ្វើការនៅក្នុងចម្ការដំឡូង ស្ថិតក្នុងភូមិថ្នល់បត់ ឃុំគោកមន ស្រុកបន្ទាយអំពិល ខេត្តឧត្តរមានជ័យ បង្កការភ្ញាក់ផ្អើលកាលពីព្រឹកថ្ងៃទី៣០ ខែមីនា ឆ្នាំ២០២២។
អាជ្ញាធរស្រុកបន្ទាយអំពិល បានឱ្យដឹងថា នៅក្នុងហេតុការណ៍វាយប្រហារពីសំណាក់សត្វខ្ទីងនេះ បានបណ្តាលឱ្យអ្នកភូមិ ចំនួន៣នាក់ រងរបួស និងត្រូវបានបញ្ចូនទៅសង្រ្គោះនៅមន្ទីរពេទ្យបង្អែកខេត្ត។
របាយការណ៍របស់អាជ្ញាធរបានឱ្យដឹងថា អ្នកដែលរងរបួសរួមមាន-ឈ្មោះយន់ វឿ ភេទប្រុស អាយុ៥៤ឆ្នាំ -ឈ្មោះ ស្នែ នៀវ ភេទស្រី អាយុ៥៥ឆ្នាំ និង-ឈ្មោះ ទិ គ្រឹង ភេទប្រុស អាយុ៣១ឆ្នាំ ។
ជនរងគ្រោះបានឱ្យដឹងថា នៅថ្ងៃកើតហេតុ គឺពួកគាត់បានធ្វើការក្នុងចម្ការដំឡូងជាធម្មតា លុះក្រោយមកក៏ស្រាប់តែលេចចេញសត្វខ្ទីងដ៏ធំ១ក្បាល ដេញវាយប្រហារ បណ្តាលឱ្យរងរបួស ហើយខ្លះទៀតរត់ឡើងដើមឈើរួចផុតពីគ្រោះថ្នាក់។
បន្ទាប់ពីមានហេតុការណ៍កើតឡើង អាជ្ញាធរបានចុះអន្តរាគមន៍ និងដាក់កម្លាំងហ៊ុមព័ទ្ធចាំចាប់សត្វខ្ទីង ដើម្បីបង្ការគ្រោះថ្នាក់ដល់អាយុជីវិតរបស់អ្នកភូមិ៕
