ភ្នំពេញ៖ រាជរដ្ឋាភិបាលកម្ពុជា បានជំរុញឱ្យមានយុទ្ធសាស្រ្តត្រៀមប្រេងឥន្ឋនៈស្តុកទុក ខណៈសង្រ្គាមរវាងរុស្ស៊ី និងអ៊ុយក្រែន បានធ្វើឱ្យតម្លៃប្រេងកើនឡើងជាសកល។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការស្ពានអាកាស និងផ្លូវក្រោមដីចោមចៅ ថា ការបញ្ជាឱ្យដោះស្រាយស្តុកយុទ្ធសាស្រ្តត្រៀមទុកប្រេង គឺដើម្បីជៀសវាងខ្វះប្រេងប្រើ។
សម្តេចតេជោ ហ៊ុន សែន មានប្រសាសន៍លើកឡើងថា សេចក្តីត្រូវការ និងការផ្គត់ផ្គង់ ដែលរាជរដ្ឋាភិបាល បានគិតគូរត្រៀមទុកសំរាប់ជាតិ និងប្រជាជនបច្ចុប្បន្ននេះ គឺខុសពីអតីតកាល។
សម្តេចបន្តថា ប្រសិនបើអគ្គិសនីខ្វះ វារីអគ្គិសនីខ្វះទឹកមិនដើរ តែមានម៉ាស៊ីន៤០០មេហ្គាវ៉ាត់ ដើម្បីបញ្ឆេះផ្គត់ផ្គង់អគ្គិសនី ដូច្នេះហើយត្រូវការត្រៀមប្រេងទុក។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា ធ្លាប់បានថ្លែងថា តម្លៃប្រេងសាំងគ្រប់គ្រងលែងកើតហើយ ឥទ្ធិពលកើតចេញពីសង្រ្គាមរវាងប្រទេសរុស្ស៊ី និងប្រទេសអ៊ុយក្រែន ហើយបានធ្វើឱ្យប៉ះពាល់ទូទាំងពិភពលោក៕
