ភ្នំពេញ៖ វ៉ាក់សាំងបង្ការជំងឺកូវីដ-១៩ ចំនួន១,៥លានដូស ដែលជាផ្នែកមួយ នៃជំនួយរបស់ រដ្ឋាភិបាលចិន ចំនួន២០លានដូស បានដឹកមកដល់កម្ពុជា នាព្រឹកថ្ងៃទី៣០ ខែមីនា ឆ្នាំ២០២២។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានមានប្រសាសន៍ថា នេះជាជំហានទី១ ក្នុងការទទួលវ៉ាក់សាំងចំនួន៥លានដូស ហើយ១៥ លានដូសទៀត នឹងពិភាក្សាគ្នាតាមក្រោយ។
លោកស្រីបានលើកឡើងថា រាជរដ្ឋាភិបាលកម្ពុជា នៅតែជំរុញឱ្យមានការចាក់វ៉ាក់សាំងកូវីដ- ១៩ ឱ្យបានគ្រប់ៗគ្នា ជាពិសេសកុមារដែលមានអាយុពី ៣ ទៅ៥ ឆ្នាំ ដើម្បីកាត់បន្ថយការឆ្លងនិងគ្រោះថ្នាក់ដល់បាត់បង់ជីវិត។
នៅក្នុងជំនួបតាមទូរស័ព្ទ ជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី១៨ ខែមីនា កន្លងទៅនេះ លោក ស៊ី ជិនពីង ប្រធានាធិបតីចិន បានប្រកាសផ្តល់ជូនកម្ពុជា នូវវ៉ាក់សាំងបង្ការជំងឺកូវីដ-១៩ ចំនួន២០លានដូស។
សូមបញ្ជាក់ថា គិតត្រឹមថ្ងៃទី២៩ ខែមីនា ឆ្នាំ២០២២ អត្រាចាក់វ៉ាក់សាំងបង្ការជំងឺកូវីដ-១៩ នៅកម្ពុជា សម្រេចបានលទ្ឋផល៩២,៦២ភាគរយ នៃចំនួនប្រជាជនសរុប ១៦លាន នាក់៕
