“ខ្ញុំកើតក្នុងគ្រួសារអ្នកលក់ដូរធម្មតាមួយ ដូច្នេះហើយជាហេតុដែលធ្វើឲ្យខ្ញុំមើលទៅមិនដែលស្អាត ហើយមានអនាម័យទេ។ ជាក្មេងដែលចូលចិត្តធ្វើច្រើនជាងនិយាយ។ ខ្ញុំ​ចាប់​ផ្ដើម​ស្គាល់​តន្ត្រី ស្រឡាញ់​តន្ត្រី និង​ជា​មិត្ត​នឹង​តន្ត្រី​តាំង​ពី​ខ្ញុំ​នៅ​ក្មេង”។ នេះគឺជាពាក្យមួយឃ្លាដែលលោកវណ្ណដា បានលើកឡើងនៅក្នុងការធ្វើបទសម្ភាសន៍មួយ។ នៅក្នុងរយៈពេលប៉ុន្មានឆ្នាំចុងក្រោយនេះ ពិភពតន្រ្តីរបស់កម្ពុជា ហាក់ដូចជាចាប់ផ្តើមងើបឡើងវិញ​ជាពិសេស​ ចង្វាក់ ហ៊ីបហប បែបរ៉េប ដែលមិនសូវមានប្រជាប្រិយភាពប៉ុន្មានទេនៅក្នុងសង្គមកម្ពុជាកាលពីមុន ប៉ុន្តែវាចាប់ផ្តើមផ្ទុះឡើងវិញយ៉ាងគួរឲ្យភ្ញាក់ផ្អើល តាមរយៈបទចម្រៀងនិងទឹកដៃនិពន្ធដ៏មានទេព្យកោសលរបស់តារាខ្មែរសម័យថ្មីជាច្រើនដួង ជាពិសេសជាងគេនោះគឺ លោកវណ្ណដា។ តែទោះជាយ៉ាងណា យើងមិនទាន់ស្គាល់លោកច្បាស់ទេ ថាតើលោកជានរណាពីមុនហើយ មកពីណា និងមានប្រវត្តិបែបណា។ តោះ! សូមទស្សនាវីដេអូនេះទាំងអស់គ្នា!

លោក ម៉ាន់ វណ្ណដា ឬត្រូវបានគេដាក់រហស្សនាមឲ្យថា ស្តេចរ៉េបស្រុកខ្មែរ កើតនៅថ្ងៃទី២២ ខែមករា ឆ្នាំ ១៩៩៧ នៅក្នុងខេត្ត ព្រះសីហនុ។សព្វថ្ងៃលោកជា​ អ្នកចម្រៀង, អ្នកនិពន្ធបទចំរៀង, អ្នកផលិតបទចំរៀង ហើយនិង អ្នករ៉េប ។ លោកជាក្មេងដែលមិនសូវពូកែនិយាយស្តីទេ តែជាក្មេងដែលពូកែអត់ធ្មត់ តស៊ូ និងព្យាយាមនៅក្នុងការងារ ហើយលោកមានទេពកោសល្យតាំងពីកំណើតផ្នែកខាងសរសេរ តែងនិងនិពន្ធ។ម្យា៉ងវិញទៀត កាលនៅកុមារភាព លោកចូលចិត្ត បទចំរៀង បែបចង្វាក់ រ៉េប និងហ៊ីបហប យ៉ាងខ្លាំង។ដូច្នេះហើយនៅក្នុងកំឡុងពេលសិក្សានៅវិទ្យាល័យ លោកបានចាប់ផ្តើមរៀនបង្កើតចង្វាក់ភ្លេង និងតែងនិពន្ធ ជាពិសេសនៅក្នុងឆ្នាំ ២០០៩ ។តែទោះជាយ៉ាងណា លោកក៏ធ្លាប់ត្រូវបានគ្រូ និងមិត្តរួមថ្នាក់សើចចំអកឲ្យដែរ នៅពេលដែលលោកត្រូវបានគ្រូសួរថា តើធំឡើងចង់ធ្វើអ្វី? ហើយលោកបានឆ្លើយតបថា ចង់ធ្វើជា “តារា” ឬ ជា “តារារ៉េបដ៏ល្បី”។ តែលោកមិនបានខ្វល់ទេ​ ដោយនៅក្នុងឆ្នាំ ២០១៤ លោកបានសម្រេចចិត្តមករស់នៅក្នុងទីក្រុងភ្នំពេញ ដើម្បីដើរតាមក្តីស្រមៃនិងសម្រេចវាឲ្យបាន។នៅពេលមកដល់ភ្នំពេញមុនដំបូង វណ្ណដា បានស្នាក់នៅក្នុងវត្តហើយគ្មានម៉ូតូជិះទេ។ ហើយពេលទំនេរគាត់តែងតែទៅរៀនធ្វើភ្លេងជារៀងរាល់ថ្ងៃ និយាយជារួមគាត់សឹងតែនៅជាមួយភ្លេងសឹងតែ២៤ ម៉ោង។ 

ការប្រឡូកចូលសិល្បៈ និងភាពជោគជ័យ 

នៅក្នុងឆ្នាំ ២០១៦ លោកវណ្ណដា បានចាប់ផ្តើមការងារនៅក្នុងវិស័យសិល្បៈជាមួយនឹងបទចំរៀងដំបូងរបស់លោក​ គឺបទ “គេជាអ្នកណា”ហើយទទួលបានការចាប់អារម្មណ៍យ៉ាងខ្លាំងនៅក្នុងចំណោមស្រទាប់យុវវ័យនៅពេលនោះ។ ចំណែកឯបទទីពីរគឺបទ “ឈឺទេ!”ដែលបានចេញផ្សាយជាផ្លូវការក្នុង បណ្តាញ យូធូប ផ្ទាល់របស់លោក នៅថ្ងៃទី ២៩ ខែមេសា ឆ្នាំ​ ២០១៧​ ហើយសព្វថ្ងៃបទនេះមានអាយុប្រាំឆ្នាំហើយនិងមានអ្នកចូលទស្សនាចំនួន១៣លាន views។ 

ក្នុងឆ្នាំ ២០១៩ គាត់បានចាប់ផ្តើមចុះក្រុងត្រាចូលរួមជាមួយ “ផលិតកម្មបារមី” ហើយបានចេញបទ “J+O” ជាចង្វាក់ហ៊ីបហប ដែលធ្វើឲ្យគាត់ចាប់ផ្តើមមានប្រជាប្រិយភាពក្នុងចំណោមមហាជនយ៉ាងខ្លាំង។ ចាប់ពីឆ្នាំ ២០១៦ ដល់ឆ្នាំ ២០២០ លោកបានបង្កើត អាល់ប៊ុមដំបូងរបស់លោក ដែលមានឈ្មោះថា “ស្កាល់ដឹអាល់បុ៊ម” ដែលនិយាយរៀបរាប់អំពីវដ្តនៃជីវិតគឺការកើត ចាស់ ឈឺ និងស្លាប់។ 

នៅក្នុងឆ្នាំ ២០២០ដដែល​ លោកបានសម្រេចចិត្តចេញផ្សាយជាផ្លូវការនូវ ស្កាល់ដឹអាល់ប៊ុម ហើយគាត់ថា “មុនដំបូងគាត់មិនចង់ចេញទេ ចាំចប់កូវីដសិន​ តែបន្ទាប់មកគាត់ថាត្រូវតែចេញ បើមិនចេញគឺហួសពេលហើយ”។ វាគឺជារឿងដ៏គួរឲ្យសរសើរ​សម្រាប់វណ្ណដា ពីព្រោះគ្រប់បទចំរៀងដែលលោកបានធ្វើគឺពោរពេញទៅដោយមហិច្ឆតា ការខិតខំប្រឹងប្រែង និងព្យាយាម អស់ពីកម្លាំងកាយចិត្ត ដោយរួមបញ្ចូលទាំងការបំផុសគំនិតដល់ស្រទាប់យុវជនជំនាន់ក្រោយឲ្យចេះស្រលាញ់ សិល្បៈ វប្បធម៏ និងស្នេហាជាតិ។ នៅទីបំផុត វណ្ណដា បានបង្កើតប្រវត្តិសាស្ត្រ និងបំបែកឯកទគ្គកម្មជាលើកដំបូងរបស់លោកតាមរយៈបទ “Time To Rise” ដែលបានច្រៀងរួមគ្នាជាមួយ លោកតា គង់ ណៃ ហើយដែលបទនេះត្រូវបានលាយបញ្ចូលគ្នាទាំងចាប៉ីដងវែងខ្មែរ​ និងចង្វាក់ហ៊ីបហបបែបសម័យ ហើយវាបានចេញផ្សាយជាផ្លូវការនៅថ្ងៃទី ២៨​ មីនា ឆ្នាំ​២០២១។ តាមរយៈបទ “Time To Rise” នេះកេរ្តិ៍ឈ្មោះរបស់លោកចាប់ផ្តើមល្បីរន្ទឺខ្លាំងហើយធ្វើឲ្យគេស្គាល់លោកកាន់តែច្រើនឡើងៗទាំងនៅក្នុងប្រទេស​និងក្រៅប្រទេស ហើយមកទល់នឹងថ្ងៃនេះបទនេះមានចំនួនអ្នកចូលមើលជាង៨៧លានViews។ បន្ទាប់មក បទក្រោយៗរបស់លោកក៏ចាប់ផ្តើមផ្ទុះល្បីជាបន្តបន្ទាប់​មានដូចជា៖ បទ “ម៉ាម៉ា”, “Move On”, “Catch Me If You Can”, “Born This Way”, “ស្រណោះ”, ហើយនឹងបទទើបនឹងចេញថ្មីៗនេះមាន “Solo Again”, “MONSOON”, និងបទ “Khmer Blood” ជាដើម។ ទាំងអស់គឺសុទ្ធតែជាភាពជោគជ័យតាមរយៈបទចំរៀងដែលលោកខំបង្កើតនិងតាក់តែងនិពន្ធឡើង។ 

ស្នាដៃនិងតួនាទីនៅក្នុងសិល្បៈ

ក្នុងឆ្នាំ ២០១៩​ លោកបានទទួលពាន “អ្នកសិល្បៈដ៏ល្អបំផុតប្រចាំឆ្នាំ ពី Pleng Music by Smart” និង “ចំរៀងដ៏ល្អបំផុតប្រចាំឆ្នំា ‘HOT BOY’ ពី Pleng Music by Smart”។ នៅក្នុងឆ្នាំ ២០២០​ លោកវណ្ណដា ទទួលបានពាន “តារាសិល្បៈប្រុសដ៏ល្អបំផុតប្រចាំឆ្នាំ 2020” និង “ការសំដែងតន្រ្តីដ៏ល្អបំផុតប្រចាំឆ្នាំ” ក្នុងកម្មវិធី “Cambodian Music Awards”។ ក្នុងឆ្នាំ២០២១ លោកបានទទួល “វិញ្ញាបនប័ត្រឧត្តមភាពដោយអង្គការ UNDP 2021”។ សព្វថ្ងៃ លោកជា “BrandAmbassador” របស់ Cellcard។ មិនតែប៉ុណ្ណោះ លោកក៏បានលះបង់ចំណាយពេលវេលានិងថវិកាដើម្បីធ្វើការងារសង្គមផងដែរ ដូចជាការផ្តួចផ្តើមបង្កើត “អង្គការសប្បុរសធម៏ SKULL” ជាដើម។

ស្រាវជ្រាវ និងរៀបរាងដោយ​៖ ម៉ៅ គុយដង់