ភ្នំពេញ៖ វ៉ាក់សាំងបង្ការជំងឺកូវីដ-១៩ ចំនួន៥លានដូស ដែលជាផ្នែកមួយ នៃជំនួយចំនួន២០លានដូស របស់រដ្ឋាភិបាលចិន បានដឹកមកដល់កម្ពុជា នាព្រឹកថ្ងៃទី២៩ ខែមីនា ឆ្នាំ២០២២។
លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល បានថ្លែងប្រាប់អ្នកសារព័ត៌មាននៅអាកាសយានដ្ឋាន អន្តរជាតិភ្នំពេញ ថា វ៉ាក់សាំងបង្ការជំងឺកូវីដ-១៩ ចំនួន៥លានដូស ត្រូវបានដឹកជញ្ជូនមកកម្ពុជា ចំនួន៣ជើង។
លោកស្រី យក់ សម្បត្តិ បានឱ្យដឹងដែរថា វ៉ាក់សាំងចំនួន៥លានដូសនេះ គឺជាចំនួនវ៉ាក់សាំងក្នុងចំណោមវ៉ាក់សាំង ២០លានដូស ដែលរដ្ឋាភិបាលចិន បានប្រកាសផ្តល់ជូនកម្ពុជា ក្នុងជំនួបតាមទូរស័ព្ទជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី១៨ ខែមីនា កន្លងទៅនេះ។
រដ្ឋលេខាធិការក្រសួងសុខាភិបាល បានឱ្យដឹងថា មកដល់ពេលនេះ រដ្ឋាភិបាលចិន បានផ្តល់ជំនួយវ៉ាក់សាំងមកកម្ពុជា សរុបចំនួន២៨,៧២៤,៨០០ដូស។ ក្នុងនោះ ២០លានដូស ជាជំនួយថ្មី។
របាយការណ៍របស់ក្រសួងសុខាភិបាល បានឱ្យដឹងថា គិតត្រឹមថ្ងៃទី២៨ ខែមីនា ឆ្នាំ២០២២ អត្រាចាក់វ៉ាក់សាំងបង្ការជំងឺកូវីដ-១៩ នៅកម្ពុជា សម្រេចបាន៩២,៥៩ភាគរយ នៃចំនួនប្រជាជនសរុប ១៦លាន នាក់៕
