ការស្នើឲ្យអាយស៊ីស៊ី-អង្គរ បន្តគាំទ្រវិស័យទេសចរណ៍កម្ពុជានេះ ត្រូវបានរដ្ឋមន្ត្រីក្រសួងទេសចរណ៍លោកបណ្ឌិត ថោង ខុន ធ្វើឡើងនៅក្នុងកិច្ចប្រជុំបច្ចេកទេសលើកទី៣៥ នៃគណៈកម្មាធិការអន្តរជាតិសម្របសម្រួលកិច្ចគាំពារ អភិរក្ស និងអភិវឌ្ឍន៍រមណីដ្ឋានប្រវត្តិអង្គរ ហៅកាត់ថា អាយស៊ីស៊ី-អង្គរ ដែលបានចាប់ផ្តើមជាផ្លូវការនៅព្រឹកថ្ងៃទី២៤ ខែមីនានេះ នាសណ្ឋាគារ សូហ្វីតែល អង្គរភូគីត្រា ខេត្តសៀមរាប។
ថ្លែងនៅក្នុងកិច្ចប្រជុំនោះ លោក Sardar Umar ALAM តំណាងអង្គការយូណេស្គូប្រចាំកម្ពុជា បានអរគុណចំពោះការខិតខំប្រឹងប្រែងទាំងអស់របស់អាជ្ញាធរជាតិអប្សរា ដែលធ្វើឱ្យសមិទ្ធផលការងារជាច្រើនកកើតឡើង ពិសេសក្នុងកាលៈទេសៈដ៏លំបាកនៃវិបត្តិជំងឺកូវីដ១៩ ទោះការងារខ្លះមានការកកស្ទះក្ដី តែក៏មានការងារខ្លះបន្តធ្វើដោយរលូនផងដែរ។ លោកបញ្ជាក់ផងដែរថា ទោះបីមានការប្រឈមខ្លាំងមកលើកិច្ចការជួសជុល អភិរក្សនៅតាមរមណីយដ្ឋានបេតិកភណ្ឌពិភពលោកជាច្រើន តែនៅរមណីយដ្ឋានអង្គរកិច្ចការទាំងនេះនៅតែបន្តទៅមុខ។
ចំណែកលោក Christophe GIGAUDAUT ទីប្រឹក្សាកិច្ចសហប្រតិបត្តិការ និងកិច្ចការវប្បធម៌ ស្ថានទូតបារាំងប្រចាំកម្ពុជា និងជាសហប្រធានអង្គប្រជុំ បានបង្ហាញនូវសេចក្ដីសោមនស្សរីករាយចំពោះការរៀបចំកិច្ចប្រជុំដោយផ្ទាល់នៅពេលនេះ ក្រោយខកខាននារយៈពេល២ឆ្នាំដោយសារបញ្ហាកូវីដ១៩ តែបើទោះបីជាបញ្ហាកូវីដ១៩ កើតឡើងជាសាកលយ៉ាងណាក្ដី ក៏ស្មារតីនៃការខិតខំប្រឹងប្រែងលើការងារអភិរក្សប្រាសាទមិនបានស្រាកស្រាន្តទេ ផ្ទុយទៅវិញការងារអភិរក្សនិងអភិវឌ្ឍន៍ប្រកបដោយចីរភាពក្នុងរមណីយដ្ឋានអង្គរបានសម្រេចលទ្ធផលជាច្រើននិងប្រកបដោយមោទនភាព។
លោកសាស្រ្ដាចារ្យ Azedine BESCHAOUCH លេខាធិការវិទ្យាសាស្រ្ដអាយស៊ីស៊ី-អង្គរ មានប្រសាសន៍ថា នេះជាឆ្នាំថ្មីនៃការចាប់ផ្តើមការងារតាមការដ្ឋានឡើងវិញរបស់ក្រុមអ្នកជំនាញការអាដហុក ក្រោយខកខាន២ឆ្នាំមកនេះ។ លោកថា សកម្មភាពនេះ គឺបង្ហាញពីការតភ្ជាប់ឡើងវិញនូវប្រពៃណីការងារដែលអ្នកជំនាញការធ្លាប់បានធ្វើ ដែលចុះត្រួតពិនិត្យការងារតាមការដ្ឋាននានា មុនកិច្ចប្រជុំផ្លូវការចូលមកដល់។
សូមបញ្ជាក់ថា គណៈកម្មាធិការអន្តរជាតិ អាយស៊ីស៊ី-អង្គរ រៀបចំកិច្ចប្រជុំចំនួន២ ដែលទី១នៅថ្ងៃទី២៤ ខែមីនា ជាកិច្ចប្រជុំបច្ចេកទេសលើកទី៣៥ និងនៅថ្ងៃទី២៥ កិច្ចប្រជុំពេញអង្គលើកទី២៨ ដែលកិច្ចប្រជុំនេះរៀបចំឡើង ដើម្បីបង្កើតអនុសាសន៍ក្នុងការថែរក្សាប្រាសាទបន្ថែមទៀតសម្រាប់ការអភិវឌ្ឍប្រកបដោយចីរភាព។
លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា ក្នុងរយៈពេល៥ឆ្នាំទៅមុខទៀត ដើម្បីចូលរួមលើដំណើរការស្តារវិស័យទេសចរណ៍កម្ពុជាឡើងវិញឱ្យបានចំនួនដូចកាលពីមុនពេលវិបត្តិជំងឺកូវីដ-១៩ ក្រសួងទេសចរណ៍ នឹងបន្តរួមគ្នាជាមួយក្រសួងស្ថាប័ន ពាក់ព័ន្ធនានា ដើម្បីជំរុញការស្តារនៃវិស័យទេសចរណ៍ខេត្តសៀមរាប ឱ្យបានកំណើនខ្ពស់ឡើងវិញ។ លោកថា ខេត្តសៀមរាបជាគោលដៅទេសចរណ៍ប្រកបដោយគុណភាព សុវត្ថិភាព និងបរិយាប័ន្ន ដែលត្រូវបន្តខិតខំអភិវឌ្ឍ និងបង្កើតផលិតផលទេសចរណ៍ថ្មីៗឱ្យបានកាន់តែច្រើនថែមទៀត នៅតាមតំបន់អាទិភាពទាំង៦ ដែលបានកំណត់ក្នុងផែនការមេរួចហើយ។
បន្ថែមពីនោះលោក ថោង ខុន បានថ្លែងអំណរគុណយ៉ាងជ្រាលជ្រៅចំពោះ “ICC-ANGKOR” រួមជាមួយអ្នកជំនាញការអន្តរជាតិផ្សេងទៀត ដែលជានិច្ចកាលបានគាំទ្រ និងចូលរួមសហការយ៉ាងសកម្មលើការងារអភិវឌ្ឍន៍វិស័យទេសចរណ៍នៅកម្ពុជា។ លោកក៏បានសំណូមពរឱ្យ ICC-ANGKOR បន្តចូលរួមគាំទ្រជាមួយនឹងដំណើរការនៃការអភិវឌ្ឍវិស័យទេសចរណ៍កម្ពុជា ក៏ដូចជាខេត្តសៀមរាបទាំងក្នុង និងក្រោយពេលវិបត្តិកូវីដ-១៩ ដើម្បីឆ្ពោះទៅរកគោលដៅទេសចរណ៍ដែលមានភាពទាក់ទាញ ព្រមទាំងធន់នឹងវិបត្តិកាន់តែប្រសើរជាមួយនឹងភាពប្រកួតប្រជែងខ្ពស់៕ (មានជ័យ)
