ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានបង្ហាញនូវគោលជំហរប្រឆាំងអំពើឈ្លានពានពីសំណាក់ប្រទេសខ្លាំងទៅលើប្រទេសទន់ខ្សោយដោយថា នឹងធ្វើឱ្យមានទម្លាប់មិនល្អនៅលើពិភពលោក។
មានប្រសាសន៍ក្នុងពិធីសម្ពោធដាក់ឱ្យប្រើប្រាស់ជាផ្លូវការ ផ្លូវជាតិលេខ២១ នាព្រឹកថ្ងៃពុធ ទី២៣ ខែមីនា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានហៅការឈ្លានពានរបស់ប្រទេសរុស្ស៊ី លើប្រទេសអ៊ុយក្រែនថា ជាការរំលោភបំពានពីសំណាក់ប្រទេសខ្លាំងទៅលើប្រទេសទន់ខ្សោយ និងបានបញ្ជាឱ្យមន្រ្តីតំណាងកម្ពុជានានាប្រកាន់ខ្ជាប់គោលជំហរបោះឆ្នោតប្រឆាំងនឹងការឈ្លានពាននេះ។
សម្តេចនាយករដ្ឋមន្រ្តីកម្ពុជា បានមានប្រសាសន៍លើកឡើងដែរថា សម្តេចបានបញ្ជាឱ្យរក្សាជំហរដូចដែលកម្ពុជា បានបោះឆ្នោត នៅឯអង្គការសហប្រជាជាតិ កាលពីថ្ងៃទី២ ខែមីនា ឆ្នាំ២០២២ ដោយកម្ពុជា ចូលរួមជាប្រទេសសហស្ថាបនិក នៃសេចក្តីសម្រេចចិត្តនៃកិច្ចប្រជុំពិសេសបន្ទាន់ របស់មហាសន្និបាតអង្គការសហប្រជាជាតិ ស្តីពីស្ថានការណ៍ នៅប្រទេសអ៊ុយក្រែន។
សូមបញ្ជាក់ដែរថា កាលពីថ្ងៃទី២ ខែមីនា ឆ្នាំ២០២២ មហាសន្និបាតអង្គការសហប្រជាជាតិ បានអនុម័តសេចក្តីសម្រេចមួយលើក ជុំវិញការឈ្លានពានរបស់រុស្ស៊ី នៅអ៊ុយក្រែន។ សេចក្តីសម្រេចនេះ គាំទ្រដោយបណ្តាប្រទេស ចំនួន១៤១ ដោយជំរុញឱ្យប្រទេស រុស្ស៊ី បញ្ឈប់ការឈ្លានពាននិងដកទ័ពចេញពីប្រទេសអ៊ុយក្រែន៕
