ភ្នំពេញ៖ រដ្ឋមន្រ្តី ក្រសួងមហាផ្ទៃ កំពុងពិចារណាឱ្យមានការរៀបចំកម្ទេចចោលនូវសារធាតុគីមី ផលិតគ្រឿងញៀន ដែលសមត្ថកិច្ចប្រមូលបានប្រមាណជាង៣០០តោន នាពេលកន្លងទៅ។ មានប្រសាសន៍ក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់រដ្ឋបាលខេត្តព្រៃវែង នាព្រឹកថ្ងៃអង្គារ ទី២២ ខែមីនា ឆ្នាំ២០២២នេះសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងថា ការបំផ្លាញសារធាតុគីមី ផលិតគ្រឿងញៀន ប្រមាណជាង៣០០តោន គឺត្រូវការសារធាតុមកបន្សាប ដើម្បីកុំឱ្យមានផលប៉ះពាល់កើតឡើង។
សម្ដេចក្រឡាហោម ស ខេង មានប្រសាសន៍ដែរថា កម្ពុជា កំពុងសុំសហការជាមួយប្រទេសអូស្រ្តាលី ដើម្បីធ្វើលើកិច្ចការនេះ ព្រោះពេលកន្លងទៅ ប្រទេសអូស្រ្តាលី ធ្លាប់ជួយដល់កម្ពុជា ក្នុងករណីប្រតិបត្តិការនៅត្រែងត្រយឹង ខេត្តកំពង់ស្ពឺ ម្តងរួចមកហើយដែរ។
រដ្ឋមន្ត្រីក្រសួងមហាផ្ទៃ បានមានប្រសាសន៍បញ្ជាក់ថា សារធាតុគីមីផលិតគ្រឿងញៀនប្រមាណជាង៣០០តោន ដែលសមត្ថកិច្ចប្រមូលបាននេះមិនអាចកប់ក្នុងដី ឬចាក់ក្នុងប្រឡាយទឹកបានទេ ព្រោះនឹងបង្កជាគ្រោះថ្នាក់ដល់សុខភាពសាធារណៈ។
សូមរម្លឹកថា កាលពីថ្ងៃទី២៥ ខែមករា ឆ្នាំ២០២២ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានប្រតិកម្មចំពោះការរកឃើញនូវសារធាតុគីមីផ្សំគ្រឿងញៀន ជាច្រើនតោន និងជំរុញដល់អ្នកពាក់ព័ន្ឋទាំងអស់ ត្រូវត្រួតពិនិត្យឱ្យបានច្បាស់លាស់ មុននឹងអនុញ្ញាតឱ្យនាំសារធាតុនានា ចូលកម្ពុជា បើពុំនោះទេ នឹងជាប់ជំពាក់ទទួលខុសត្រូវចំពោះសង្គមកម្ពុជា ទាក់ទងនឹងការបំផ្លាញសុខភាពសាធារណៈ៕
