ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានជំរុញដល់រដ្ឋមន្រ្តី ក្រសួងសុខាភិបាល ឱ្យពិចារណាអំពីភាពស្របច្បាប់ លើការវះកាត់ផ្លាស់ប្តូរសរីរាង្គ ដើម្បីសង្រ្គោះអាយុជីវិតអ្នកជំងឺ។
មានប្រសាសន៍ក្នុងពិធីសម្ពោធជាផ្លូវការ មន្ទីរពេទ្យមិត្តភាព កម្ពុជា-ចិន ព្រះកុសុមៈ នាព្រឹកថ្ងៃទី២១ ខែមីនា ឆ្នាំ២០២២នេះ សម្តេច នាយករដ្ឋមន្រ្តីកម្ពុជា បានលើកឡើងថា កម្ពុជាមានលទ្ធភាពវះកាត់ដូរក្រលៀន តាំងពីឆ្នាំ២០១០ តែមិនបានផ្សព្វផ្សាយឱ្យពលរដ្ឋដឹងទូលំទូលាយនោះទេ។
សម្តេចតេជោ ហ៊ុន សែន បានណែនាំឱ្យរដ្ឋមន្រ្តីក្រសួងសុខាភិបាល គិតគូរពិចារណាឱ្យការដូរក្រលៀនក្លាយជារឿងទូលំទូលាយខណៈកន្លងទៅមានពលរដ្ឋជាអ្នកជំងឺតែងទៅដូរនៅក្រៅប្រទេស។
សម្តេចតេជោ នាយករដ្ឋមន្រ្តីកម្ពុជា បានលើកឡើងដែរថា អគារមន្ទីរពេទ្យមិត្តភាព កម្ពុជា-ចិន ព្រះកុសុមៈ ដែលទើបសម្ពោធដាក់ឱ្យប្រើប្រាស់ជាផ្លូវការនេះមានសមត្ថភាពអាចដូរថ្លើមបានផងដែរ។
សូមបញ្ជាក់ថា អាគារ មន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលមានតម្លៃប្រមាណជាង៨០លានដុល្លារ មានកំពស់ ១១ជាន់ និងមាន១៣២បន្ទប់ ឬ ស្មើនឹង ៤០០គ្រែ ដោយមានបំពាក់ឧបករណ៍បច្ចេកវិជ្ជាវេជ្ជសាស្ត្រទំនើបៗនិងមានចំណតឧទ្ធម្ភាគចក្រសម្រាប់សង្គ្រោះបន្ទាន់ផងដែរ៕
