ភ្នំពេញ៖ នាយករដ្ឋមន្រ្តីកម្ពុជា បានថ្លែងស្វាគមន៍ជនជាតិ អ៊ុយក្រែន ក្នុងករណីភៀសខ្លួនមកកម្ពុជា តែហាមឃាត់មិនឱ្យពលរដ្ឋខ្មែរទៅចូលរួមប្រយុទ្ឋក្នុងសង្រ្គាមនៅប្រទេស អ៊ុយក្រែន នោះទេ។

មានប្រសាសន៍ក្នុងពិធីសម្ពោធដាក់ឱ្យប្រើប្រាស់ « ភូមិកុមារ SOS ព្រៃវែង » នៅខេត្តព្រៃវែង នាព្រឹកថ្ងៃទី១៧ ខែមីនា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា សម្តេចនៅតែពុំអនុញ្ញាតឱ្យប្រជាពលរដ្ឋកម្ពុជា ធ្វើទាហ៊ានស្ម័គ្រចិត្តទៅច្បាំងនៅប្រទេស អ៊ុយក្រែន នោះឡើយដោយសម្តេចចាត់ទុកថា ប្រៀបបាននឹងការយកសាំងទៅចាក់លើភ្លើង។

សម្តេចតេជោ ហ៊ុន សែន បានមានប្រសាសន៍លើកឡើងថា ក្នុងករណីមានជនភៀសខ្លួន អ៊ុយក្រែន មកកម្ពុជាគឺកម្ពុជានឹងទទួលឱ្យស្នាក់នៅដែលបង្ហាញពីកាយវិការនៃការយកចិត្តទុកដាក់អំពីមនុស្សជាតិទាំងអស់។

សូមរម្លឹកដែរថា នៅក្នុងពិធីសម្ពោធដាក់ឱ្យប្រើប្រាស់ មន្ទីរពេទ្យមិត្តភាពកម្ពុជា-ចិនត្បូងឃ្មុំកាលពីថ្ងៃទី៧ ខែមីនា ឆ្នាំ២០២២កន្លងទៅ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍លើកឡើងថា ដំណោះស្រាយ នៃសង្រ្គាមរវាងប្រទេសរុស្ស៊ី និងប្រទេស អ៊ុយក្រែន គឺមានតែការចរចាប៉ុណ្ណោះ ដោយម្ខាងជាមួយរុស្សី - អ៊ុយក្រែន និងម្ខាងទៀតចរចាជាមួយណាតូ៕