ភ្នំពេញ៖ នៅក្នុងជំនួបពិភាក្សាការងារតាមប្រព័ន្ធវីដេអូ ជាមួយលោកសាស្រ្តាចារ្យ វិទិត មុនតាប៊ន អ្នករាយការណ៍ពិសេសទទួលបន្ទុកសិទ្ធិមនុស្សនៅកម្ពុជា នារសៀលថ្ងៃទី១៥ ខែមីនា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានលើកឡើងថា ក្រសួងបានគិតគូដោះស្រាយលើភាពចង្អៀតណែន នៃអ្នកជាប់ឃុំ ក្នុងពន្ធនាគារ។

សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍ថា ក្រសួងមហាផ្ទៃ កំពុងយកចិត្តទុកដាក់ខិតខំកសាងហេដ្ឋារចនាសម្ព័ន្ធបន្ថែម ដើម្បីដោះស្រាយបញ្ហាចង្អៀតណែន និងកំពុងតែគិតគូការលើកលែងនូវការឃុំខ្លួនរង់ចាំនីតិវិធីតុលាការចំពោះបទល្មើសស្រាលៗមួយចំនួន ដើម្បីរួមចំណែកកាត់បន្ថយភាពចង្អៀតណែនបានមួយផ្នែក។ 

សម្ដេចក្រឡាហោម បានមានប្រសាសន៍ប្រាប់អ្នករាយការណ៍ពិសេសទទួលបន្ទុកសិទ្ធិមនុស្សនៅកម្ពុជា ដែរថា ចំនួនអ្នកជាប់ឃុំនៅកម្ពុជា មានប្រមាណជាង៣ម៉ឺននាក់ ក្នុងនោះជាង៥០ភាគជាអ្នកជាប់ឃុំ មានការពាក់ព័ន្ធករណីគ្រឿងញៀន។

យោងតាមរបាយការណ៍ឆ្នាំមុន របស់អគ្គលេខាធិការ ស្ដីពីតួនាទី និងសមិទ្ធផលរបស់ ការិយាល័យឧត្ដមស្នងការ ទទួល បន្ទុកសិទ្ធិមនុស្សនៅកម្ពុជា បានឱ្យដឹងថា ពន្ធនាគារនៅក្នុងប្រទេសកម្ពុជា មានចំនួនអ្នកជាប់ពន្ធនាគារច្រើនជាង៣ដង នៃសមត្ថភាពដែលមាន គឺដល់ទៅ៣៤៣ភាគរយ។

របាយការណ៍ដដែលនេះ បានលើកឡើងថា អ្នកជាប់ឃុំ បានប្រឈមនឹងបញ្ហាជាច្រើនផ្នែកស្មារតីនិងរាងកាយ នឹងជាហានិភ័យដែលអាចឈានទៅរកស្ថានភាពដែលបង្កឱ្យមានការប្រព្រឹត្តអំពើឃោរឃៅទៀតផង។

យ៉ាងណាក៏ដោយ នាពេលកន្លងទៅ អ្នកនាំពាក្យ នៃអគ្គនាយកដ្ឋានពន្ធនាគា ធ្លាប់បានបដិសេធ និងលើកឡើងថា ពន្ធនាគារ គឺជាទីកន្លែងឃុំឃាំងមនុស្សឱ្យកែប្រែជាពលរដ្ឋល្អ មិនមែនជាទីកន្លែងរស់នៅសុខស្រួល មានអាហារឆ្ងាញ់ៗ ដូចនៅខាងក្រៅឡើយ ហើយការចង្អៀតណែនក្នុងពន្ធនាគារ ក៏មិនមែនជារឿងថ្មីសម្រាប់កម្ពុជា ឬបណ្តាប្រទេសជាច្រើននៅលើសកលលោកដែរ ប៉ុន្តែអាជ្ញាធរពន្ធនាគារកម្ពុជាតែងខិតខំដោះស្រាយបញ្ហានេះជាមួយស្ថាប័នពាក់ព័ន្ធ និងដៃគូអភិវឌ្ឍន៍នានា ផងដែរ៕