ភ្នំពេញ៖ មន្រ្តីជាន់ខ្ពស់ក្រសួងសុខាភិបាល បានឱ្យដឹងថា បច្ចុប្បន្នកម្ពុជាមានវ៉ាក់សាំងកូវីដ-១៩ ក្នុងស្តុកជាង៦លានដូស ហើយនាពេលខាងមុខ កម្ពុជានឹងទទួលនូវវ៉ាក់សាំងចំនួន៧លានដូសបន្ថែមទៀត។
នៅក្នុងឱកាសអញ្ជើញទទួលវ៉ាក់សាំងបង្ការជំងឺកូវីដ-១៩ ប្រភេទ Astra Zeneca ដែលជំនួយរបស់រដ្ឋាភិបាល ហុងគ្រី លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល បានឱ្យដឹងថា កម្ពុជា មានវ៉ាក់សាំងសរុបទាំងអស់ជាង ៤៣លានដូស និងរហូតដល់ ខែ៩ ឆ្នាំ២០២២នេៈ កម្ពុជានឹងទទួលបន្ថែម៧លានដូស នឹងធ្វើឱ្យមានចំនួនសរុបប្រមាណជិត៥១លានដូស។
លោកស្រី យក់ សម្បត្តិ បានឱ្យដឹងដែរថា កម្ពុជាកំពុងពិភាក្សានឹងការបើកដំណើរការរោងចក្រវេចខ្ចប់វ៉ាក់សាំងកូវីដ-១៩ ក្នុងប្រទេសតែម្តង ដែលការណ៍នេះ អាចនឹងដំណើរការនៅដើមឆ្នាំ២០២៣ខាងមុខ។
របាយការណ៍របស់ក្រសួងសុខាភិបាល បានឱ្យដឹងថា គិតត្រឹមថ្ងៃទី១៥ ខែមីនា ឆ្នាំ២០២២ ក្រសួងបានចាក់វ៉ាក់សាំងកូវីដ-១៩ ជូនប្រជាពលរដ្ឋសរុបប្រមាណ ១៦លាន នាក់ ស្មើនឹង៩២,២៧ភាគរយ៕
