ភ្នំពេញ ៖ ម្ចាស់យានយន្តចំនួនជាង ៦៧៧គ្រឿង ត្រូវបានសមត្ថកិច្ចពិន័យតាមអនុក្រឹត្យលេខ ៣៩.អនក្រ.បក ក្រោយពេលរកឃើញថា បានបើកបរល្មើស ច្បាប់ចរាចរណ៍ផ្លូវគោក។

របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឱ្យដឹងថា នៅថ្ងៃទី១២ ខែមីនា ឆ្នាំ២០២២ ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោក ចំនួនគោលដៅសរុប ១៨២គោលដៅ មានយានយន្តចូលគោលដៅចំនួន ៥.៨០៧គ្រឿង ម៉ូតូ ៤.១០៦គ្រឿង ក្នុងនោះរកឃើញ យានយន្តល្មើសសរុបចំនួន ៦៧៧គ្រឿង មានម៉ូតូចំនួន ៥០៨គ្រឿង ត្រូវបានផាកពិន័យតាមអនុក្រឹត្ យលេខ៣៩.អនក្រ.បក នៅទូទាំងប្រទេស ។

របាយការណ៍ដដែល បានឱ្យដឹងដែរថា ក្នុងរយៈពេល១២ថ្ងៃ ចាប់ពីថ្ងៃទី០១-១២ ខែមីនា សមត្ថកិច្ចបានរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោក ក្នុងនោះរកឃើញយានយន្តល្មើសសរុបចំនួន ៨.០៧៧គ្រឿង ម៉ូតូមានចំនួន ៦.២៧៧គ្រឿង ត្រូវបានផាកពិន័យផងដែរ។

ជាមួយគ្នានេះ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានវាយតម្លៃថា ក្នុងរយៈពេល១២ថ្ងៃមកនេះ ការអនុវត្តតាមអនុក្រឹត្យ ការផាកពិន័យយានយន្តល្មើស បានដំណើរការទៅយ៉ាងល្អប្រសើរ និងទទួលបានការគាំទ្រ ពីអ្នកប្រើប្រាស់ផ្លូវយ៉ាងល្អប្រសើរ។

សូមរំលឹកថា កាលពីទី២៣ ខែកុម្ភៈ ឆ្នាំ២០២២ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ធ្លាប់បានជំរុញដល់មន្រ្តីឱ្យបន្តពង្រឹងកិច្ចសហការជាមួយក្រសួងស្ថា  ប័ននានា ដើម្បីរួមគ្នាផ្សព្វផ្សាយដល់សាធារណជន អំពីច្បាប់ចរាចរណ៍ផ្លូវគោក ដើម្បីលើកកម្ពស់ការយល់ដឹង និងការអនុវត្តច្បាប់។

របាយការណ៍របស់ក្រសួងមហាផ្ទៃ បានឱ្យដឹងថា គ្រោះថ្នាក់ចរាចរណ៍ ក្នុងឆ្នាំ២០២១ មានចំនួន២ ៦៧០លើក បើប្រៀបធៀបនឹងឆ្នាំ២០២០ មានចំនួន៣ ១៧៦លើក គឺថយចុះ១៦ភាគរយ។

របាយការណ៍បញ្ជាក់ថា ក្នុងករណីគ្រោះថ្នាក់ចរាចរណ៍រយៈពេល១ឆ្នាំ បង្កឱ្យមានមនុស្សស្លាប់ចំនួន១ ៤៩៧នាក់ បើប្រៀបធៀបនឹងឆ្នាំ២០២០ មានចំនួន ១ ៦៤៦នាក់ គឺថយចំនួន ១៤៩នាក់ ស្មើនឹង៩ភាគរយ។ ចំណែកអ្នករងរបួសមានចំនួន៣ ៦១៥នាក់ គឺមានការថយចុះ ១ ០៧១នាក់ ស្មើនឹង២៣ភាគរយ បើប្រៀបធៀបនឹងឆ្នាំ២០២០ ដែលមានអ្នករងរបួសរហូតដល់ ៤ ៦៨៦នាក់ ៕