ពោធិ៍សាត់៖ កម្លាំងសមត្ថកិច្ច បានបញ្ជូនខ្លួនជនជាតិវៀតណាម ចំនួន ៨នាក់ ទៅសាលាដំបូងខេត្តពោធិ៍សាត់ បន្ទាប់ពីបានឃាត់ខ្លួនពាក់ព័ន្ឋករណីបទល្មើសនេសាទនៅលើផ្ទៃទឹកបឹងទន្លេសាប។
របាយការណ៍របស់សមត្ថកិច្ចខេត្តពោធិ៍សាត់បានឱ្យដឹងថា ជនជាតិវៀតណាមទាំង៨នាក់ ត្រូវបានចាប់ខ្លួនក្នុងប្រតិបត្តិការបង្ក្រាបបទល្មើសនេសាទ នៅលើផ្ទៃទឹកបឹងទន្លេសាប ត្រង់ចំណុចផ្លូវទឹកព្រំប្រទល់ខេត្តពោធិ៍សាត់ និងខេត្តកំពង់ធំ ស្ថិតនៅភូមិកំពង់លើ ឃុំក្បាលត្រាច ស្រុកក្រគរ ខេត្តពោធិ៍សាត់ កាលពីថ្ងៃទី៩ ខែមីនា ឆ្នាំ២០២២ និងបានរកឃើញឧបករណ៍នេសាទខុសច្បាប់ជាច្រើនផងដែរ។
យោងតាមរបាយការណ៍របស់សមត្ថកិច្ចបានបញ្ជាក់ថា ឧបករណ៍នេសាទខុសច្បាប់ដែលបានរឹបអូស រួមមាន៖ អ៊ួនកែច្នៃអូសទឹកសាបចំនួន ៤វង់ សំបកបាឡាឈើភ្ជាប់ម៉ាស៊ីនចំនួន ៦គ្រឿង និងឧបករណ៍មួយចំនួនទៀត។
វត្ថុតាងទាំងអស់ ត្រូវបានយកទៅរក្សាទុកជាបណ្ណោះអាសន្ននៅស្នាក់ការផ្នែករដ្ឋបាលជលផលក្រគរ។
កាលពីពេលថ្មីៗនេះលោក សុខ ទូច ប្រធានរាជបណ្ឌិត្យសភាកម្ពុជា បានជំរុញដល់អាជ្ញាធរតាមបណ្តាខេត្តជុំវិញបឹងទន្លេសាបនិងរដ្ឋបាលជលផល ឱ្យពង្រឹងការចុះល្បាតស្រាវជ្រាវទប់ស្កាត់និងបង្ក្រាបអ្នកឆក់ត្រី ក្នុងបឹងទន្លេសាប។
លោកបានអះអាងថា តាមរយៈបទល្មើសឆក់ត្រីនេះបានធ្វើឱ្យរាជរដ្ឋាភិបាល បាត់ប្រាក់ចំណូលប្រមាណ១ម៉ឺនដុល្លារក្នុង១យប់៕
