បន្ទាយមានជ័យ៖ របាយការណ៍របស់រដ្ឋបាលខេត្តបន្ទាយមានជ័យ បានឱ្យដឹងថា ក្នុងឆ្នាំ២០២១កន្លងទៅ អាជ្ញាធរថៃ ចាប់បញ្ជូនពលករខ្មែរប្រមាណ ៤.០០០នាក់ មកកម្ពុជាវិញតាមច្រកអន្តរជាតិ ប៉ោយប៉ែត ខេត្តបន្ទាយមានជ័យ។
របាយការណ៍របស់រដ្ឋបាលខេត្តបន្ទាយមានជ័យ ក្នុងសន្និបាតបូកសរុបលទ្ធផលការងាឆ្នាំ២០២១ និងលើកទិសដៅបន្តឆ្នាំ២០២២ បានឱ្យដឹងថា សម្រាប់ខេត្តបន្ទាយមានជ័យ មានពលរដ្ឋខ្មែរធ្វើចំណាកស្រុក ចំនួនជាង ៦៣.០០០នាក់ ក្នុងនោះមានកុមារចំនួនជាង ៧.០០០នាក់ និងព្រះសង្ឃចំនួន ៩អង្គ ផងដែរ។
របាយការណ៍ដដែលបានបញ្ជាក់ថា នាពេលកន្លងទៅអាជ្ញាធរថៃ បានចាប់បញ្ជូនពលករខ្មែរឆ្លងដែនខុសច្បាប់ តាមច្រកអន្តរជាតិ ប៉ោយប៉ែត មានចំនួន ៣៤១លើក សរុបចំនួន ៤.៦៩២នាក់ (ស្រីចំនួន ២.១៩៨នាក់ និងកុមារចំនួន ៤៥៩នាក់) ដោយពិនិត្យឃើញវិជ្ជមានកូវីដ-១៩ ចំនួន ៤៩នាក់ (ស្រី១៩នាក់)។
សូមបញ្ជាក់ថា អាជ្ញាធរខេត្តបន្ទាយមានជ័យ បានពង្រឹងការត្រួតពិនិត្យនៅតាមច្រកមួយចំនួនដូចជា ច្រកបឹងត្រកួន ច្រកប៉ោយប៉ែត ច្រកអូរបីជាន់ និងច្រកស្រុកម៉ាឡៃ ដើម្បីការពារសកម្មភាពឆ្លងដែនខុសច្បាប់ ខណៈមេខ្យល់មួយចំនួន ក៏ត្រូវបានចាប់ខ្លួនបញ្ជូនទៅតុលាការផងដែរ៕
