ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍លើកឡើងថា រាដ្ឋាភិបាលអ៊ុយក្រែន នឹងឈ្នះសង្គ្រាម ហើយក៏មិនអាចលុប អ៊ុយក្រែន ចេញពីផែនទីពិភពលោកបានដែរ។ មានប្រសាសន៍ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវកំណាត់ផ្លូវជាតិលេខ៣(ភ្នំពេញ-កំពត) នាព្រឹកថ្ងៃទី២ ខែមីនា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានលើកឡើងថា ទ័ពដែលទៅពីឆ្ងាយមិនអាចឈ្នះអ្នកនៅខាងក្នុងនោះទេ។

សម្តេចតេជោបន្តថា តាមរយៈបទពិសោធន៍ដែលមើលឃើញកន្លងមក អាណានិគម បារាំង និងប្រទេសដែលដាក់យោធាលើប្រទេសណាមួយ គឺមិនជោគជ័យនោះដែរ ហើយសង្គ្រាមនៅអ៊ុយក្រែន បានក្លាយជាសង្គ្រាមរុស្សី និងអឺរ៉ុប ។

សម្តេចតេជោនាយករដ្ឋមន្រ្តីកម្ពុជា មានប្រសាសន៍ទៀតថា សង្គ្រាមរវាងរុស្សី និងអ៊ុយក្រែននឹងក្លាយជាសង្គ្រាមឈ្លបមួយដែលនឹងបង្ហូរឈាមរាល់ថ្ងៃ ប្រសិនបើរុស្សី នៅតែដាក់យោធានៅអ៊ុយក្រែន។

សម្តេចតេជោ ហ៊ុន សែន បានបង្ហាញគោលជំហររបស់កម្ពុជា ជំទាស់ការគំរាមកំហែងប្រើប្រាស់កម្លាំងទៅលើភាគីមួយទៀត ហើយក៏មិនត្រូវយកសង្គ្រាមប្រឆាំងសង្គ្រាមដែរ។

សូមបញ្ជាក់ថា ប្រទេសអ៊ុយក្រែន កំពុងរងការឈ្លានពានដោយកម្លាំងយោធារុស្ស៊ី ក្នុងប្រតិបត្តិការយោធាពិសេស ដែលចុះហត្ថលេខាដោយលោក Vladimir Putin។ ក្នុងប្រតិបត្តិការឈ្លានពាននេះ បានធ្វើឱ្យពលរដ្ឋ និងទាហ៊ាន អ៊ុយក្រែន ព្រមទាំងទាហ៊ាន រុស្ស៊ី រាប់ពាន់នាក់ បានស្លាប់ និងមួយចំនួនទៀតបានរងរបួស ខណៈពលរដ្ឋ អ៊ុយក្រែន ជាច្រើន បានភៀសខ្លួនទៅកាន់ប្រទេសជិតខាង៕