លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណិ្ឌត្យសភាកម្ពុជា ហើយជាអ្នកតាមដាននយោបាយលើពិភពលោកបានអះអាងនៅថ្ងៃនេះថា ជាការពិតណាស់សង្គ្រាម ទោះបីកើតនៅទីណាក៏ដោយ នៅជ្រុងណានៃពិភពលោកក៏ដោយ តែងតែផ្ដល់ផលអវិជ្ជមានទៅដល់តំបន់ ក៏ដូចជាប្រទេសផ្សេងៗលើពិភពលោក ហើយចំពោះសង្រ្គាម រវាងរុស្ស៊ី និងអ៊ុយក្រែននេះ វានឹងជះឥទ្ធិពលមកលើកម្ពុជាយើងផងដែរ ទាំងទេសចរ សេដ្ឋកិច្ច និងពាណិជ្ជកម្ម។
លោកបណ្ឌិត គិន ភា អះអាងថា សម្រាប់វិស័យទេសចរណ៍នៅកម្ពុជា នៅពេលដែលរុស្ស៊ីជួបវិបត្តិសេដ្ឋកិច្ច ប្រជាពលរដ្ឋក៏ជួបវិបត្តិហិរញ្ញវត្ថុដូចគ្នាដែរ ដូច្នេះពួកគាត់មានទឹកចិត្តឯណា ដើម្បីធ្វើទេសចរណ៍ទៅកាន់បណ្ដាប្រទេសផ្សេងៗ។ លោកថា កម្ពុជាយើងទើបតែទទួលបានព័ត៌មានថាថ្មីៗនេះថា ទេសចរណ៍រុស្ស៊ីបានកើនឡើងច្រើននៅក្រុងព្រះសីហនុ ដូច្នេះនៅពេលរុស្ស៊ីមានបញ្ហា វិបត្តិទេសចរមកកាន់កម្ពុជា នឹងមានបញ្ហាផងដែរ។ បន្ថែមលើបញ្ហានេះ ក្រោយផ្ទុះសង្រ្គាម មានបណ្ដាប្រទេសមួយចំនួន ក៏បានបិទជើងហោះហើររបស់ប្រទេសរុស្ស៊ី ដូច្នេះនេះគឺជាបញ្ហាប្រឈម និងជាបញ្ហាប៉ះពាល់ផលអវិជ្ជមាន។
សូមបញ្ជាក់ថា ថ្មីៗនេះ អភិបាល នៃគណៈអភិបាលខេត្តព្រះសីហនុ ទើបតែអះអាងថា ទេសចររុស្ស៊ី ជាប់ចំណាត់ថ្នាក់លេខ៣ បន្ទាប់ពីចិន និងវៀតណាម សម្រាប់ខេត្តព្រះសីហនុ។ បើតាមលោក គួច ចំរើន ក្រោយពីជំងឺកូវីដ-១៩ នៅកម្ពុជាបានធូរស្រាល ហើយបើកឲ្យទេសចរវ៉ាក់សាំងចូលនោះ មានអ្នកទេសចររុស្ស៊ីយ៉ាងច្រើន បានចូលទៅកាន់ខេត្តព្រះសីហនុ ធ្វើឲ្យចំនួននៃអ្នកទេសចររុស្ស៊ី បានជាប់ចំណាត់ថ្នាក់លេខ៣។
បើតាមលោក គួច ចំរើន អះអាងថា ខេត្តព្រះសីហនុ ក៏មានអ្នកវិនិយោគរុស្សីច្រើនផងដែរ ដែលពួកគេបានមកវិនិយោគលើវិស័យទេសចរ ជាពិសេសការវិនិយោគនៅកោះក្របី ក្នុងឃុំរាម ស្រុកព្រៃនប់ ដែលមានភាពល្បីល្បាញ ដោយបានរៀបចំយ៉ាងប្រណិត និងការថែទាំបរិស្ថានជាគំរូ ក្នុងការវិនិយោគ។
ទាក់ទងសង្រ្គាមរវាងរុស្ស៊ី និងអ៊ុយក្រែននេះដែរ លោកបណ្ឌិត គិន ភា បានអះអាងថា កុំថាឡើយវិស័យទេសចរ សូម្បីតែវិស័យសេដ្ឋកិច្ច និងពាណិជ្ជកម្ម ក៏រងផលប៉ះពាល់ផងដែរ។ លោកថា វិស័យពាណិជ្ជកម្ម នៅពេលដែលរុស្ស៊ីជាប់ទណ្ឌកម្ម ឬទទួលការដាក់ទណ្ឌកម្មរបស់អង្គការសហប្រជាជាតិ ឬប្រទេសផ្សេងៗ អាចធ្វើឱ្យប៉ះពាល់ដល់វិស័យពាណិជ្ជកម្មរបស់រុស្ស៊ី ជាមួយបណ្ដាប្រទេសផ្សេងៗ រាប់ទាំងប្រទេសកម្ពុជាផង។
ចំណែកវិស័យសេដ្ឋកិច្ច បើកើតសង្គ្រាមនេះ តម្លៃប្រេងនឹងមានការហក់ឡើង ពីព្រោះរុស្ស៊ីជាប្រទេសដែលផ្គត់ផ្គង់ប្រេង ផ្គត់ផ្គង់ថាមពលធំផងដែរនៅលើពិភពលោក ដូច្នេះវានឹងជះឥទ្ធិពលជាអវិជ្ជមាន នៅពេលដែលតម្លៃប្រេងហក់ឡើង ហើយវាធ្វើនឹងធ្វើឲ្យប៉ះពាល់ដល់ខ្សែច្រវ៉ាក់ផលិតកម្មផ្សេងៗនៅជុំវិញពិភពលោក៕