ភ្នំពេញ៖ រថយន្តម៉ាក Ford មួយគ្រឿង ត្រូវបានរថភ្លើងបុកខ្ទេចមួយកំណាត់ផ្នែកខាងមុខ ក្រោយពេលបើកបំពានបារ៉ាស់ហាមឃាត់ក្នុងពេលរថភ្លើងកំពុងធ្វើដំណើរ បង្កការភ្ញាក់ផ្អើល កាលពីវេលាម៉ោង១០ យប់ថ្ងៃទី ២៨ ខែកុម្ភៈ ឆ្នាំ២០២២ នៅតាមបណ្ដោយផ្លូវជាតិលេខ៤ កែងនិងផ្លូវរថភ្លើង ស្ថិតក្នុងសង្កាត់ចោមចៅទី៣  ខណ្ឌពោធិ៍សែនជ័យ។

នៅក្នុងហេតុការណ៍នេះ បណ្ដាលឲ្យរថយន្តពាក់ស្លាកលេខសៀមរាប 2C-4536 រងការខូចខាតផ្នែកខាងមុខ តែមិនបង្កឲ្យមានអ្នករងរបួសទេ។

អ្នកបើកបររថយន្តបានឱ្យដឹងថា មុនកើតហេតុ មានរថយន្តមួយគ្រឿង បានបើកបុករថយន្ត ប្អូនរបស់ខ្លួន នៅចំណុចផ្លូវកប់ស្រូវ ហើយមិនបានឈប់ដោះស្រាយគ្នាទេ តែបែរជាព្យាយាមបើករត់ ជាហេតុធ្វើឱ្យគាត់បើកដេញពីក្រោយ លុះមកដល់ចំណុចកើតហេតុ ក៏ជ្រុលបុកជាមួយរថភ្លើងតែម្តង។

ក្រោយមានហេតុការណ៍កើតឡើង សមត្ថកិច្ចបានចុះដល់ទីតាំង ដើម្បីជួយអន្តរាគមន៍ ហើយម្ចាស់រថយន្តបានសុំយករថយន្តទៅជួសជុលដោយខ្លួនឯង តែភាគីខាងរថភ្លើង សុំឱ្យសមត្ថកិច្ចយកទៅរក្សាទុកសិន ដើម្បីរង់ចាំធ្វើការដោះស្រាយតាមក្រោយ៕