ភ្នំពេញ៖ មន្រ្តីជំនាញ នៃអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ( CCF ) បានពិន័យលើម្ចាស់ស្ថានីយ/ដេប៉ូប្រេងឥន្ធនៈ ចំនួន៨កន្លែង ក្រោយពេលពិនិត្យរកឃើញនូវអំពើមិនសុចរិត។

របាយការណ៍របស់អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ( CCF ) បានឱ្យដឹងថា នាអំឡុងទី២៣ ដល់ថ្ងៃទី២៦ ខែកុម្ភៈ ឆ្នាំ២០២២ មន្រ្តីជំនាញ បានចុះពិនិត្យលើស្ថានីយ/ដេប៉ូប្រេងឥន្ធនៈ ចំនួន ៤១ទីតាំង និងបានរកឃើញ អំពើមិនសុចរិតលើ ៨ដេប៉ូប្រេង។

អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំបានឱ្យដឹងបន្តថា ប្រតិបត្តិការចុះត្រួតពិនិត្យអនុលោមភាពនេះ បានធ្វើឡើងនៅតាមបណ្តាស្ថានីយ/ដេប៉ូប្រេងឥន្ធនៈ ស្ថិតក្នុងស្រុកស្ទោងនិងស្រុកស្ទឹងសែន ខេត្តកំពង់ធំ ស្រុករលាប្អៀរ និងស្រុកកំពង់ត្រឡាច ខេត្តកំពង់ឆ្នាំង ស្រុកបុទុមសាគរ និងក្រុងខេមរភូមិន្ទ ខេត្តកោះកុង ក្រុងសៀមរាប ខេត្តសៀមរាប។

ជាមួយគ្នានេះ ម្ចាស់ដេប៉ូដែលប្រព្រឹត្តល្មើស ត្រូវបានមន្ត្រីជំនាញចាត់វិធានការពិន័យអន្តរការណ៍នៅនឹងកន្លែង និងបានតម្រូវឱ្យធ្វើកិច្ចសន្យាបញ្ចប់ការរកស៊ីកេងប្រវ័ញ្ចដោយចេតនានិងអចេតនា ពីអតិថិជនដែលជាអ្នកប្រើប្រាស់ផងដែរ៕