ភ្នំពេញ៖ មន្រ្តីក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា មានអតីតនិស្សិតកម្ពុជា ដែលបានទៅសិក្សាក្នុងជំនាន់អតីតសហភាពសូវៀត ក្នុងរង្វង់ទស្សវត្សទី៨០ និង ដើមទស្សវត្សទី៩០ ចំនួន ២៣នាក់ កំពុងរស់នៅលើទឹកដីប្រទេសអ៊ុយក្រែន។
 
លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានប្រាប់សារព័ត៌មានក្នុងស្រុកថា តាមព័ត៌មានទទួលបានពី សមាគមអតីតនិស្សិតកម្ពុជានៅសហភាពសូវៀត  ពុំមាននិស្សិតកម្ពុជា ដែលបច្ចុប្បន្នកំពុងសិក្សានៅក្នុងប្រទេសអ៊ុយក្រែនទេ ប៉ុន្តែមានអតីតនិស្សិតដែលបានទៅសិក្សាក្នុងជំនាន់អតីតសហភាពសូវៀត ក្នុងរង្វង់ទស្សវត្សទី៨០ និង ដើមទស្សវត្សទី៩០  ចំនួន ២៣នាក់ បានរស់នៅលើទឹកដីប្រទេសអ៊ុយក្រែន ជាមួយគ្រួសាររបស់ពួកគេ។

អ្នកនាំពាក្យក្រសួងការបរទេស និង សហប្រតិបត្តិការអន្តរជាតិ បានឱ្យដឹងដែរថា ស្ថានទូតកម្ពុជា ប្រចាំនៅរុស្សី កំពុងខិតខំទំនាក់ទំនងជាមួយពលរដ្ឋខ្មែរទាំងនោះ ដើម្បីទទួលបានព័ត៌មានអំពីស្ថានភាពរបស់ពួកគាត់។

សូមបញ្ជាក់ថា ប្រទេសអ៊ុយក្រែន កំពុងរងការឈ្លានពានដោយកម្លាំងយោធារុស្ស៊ី ក្នុងប្រតិបត្តិការយោធាពិសេស ដែលចុះហត្ថលេខាដោយលោក Vladimir Putin។ ក្នុងប្រតិបត្តិការឈ្លានពាននេះ បានធ្វើឱ្យពលរដ្ឋ និងទាហ៊ានអ៊ុយក្រែន ជាង១០០នាក់ បានស្លាប់និងមួយចំនួនទៀតបានរងរបួស៕

អត្ថបទ៖លាង ឡា