ភ្នំពេញ ៖ ជនសង្ស័យប្រុស ស្រី ចំនួន៣៦នាក់ ត្រូវបានសមត្ថកិច្ចឃាត់ខ្លួន នៅក្នុងរង្វង់ប្រតិបត្តិការបង្ក្រាបគ្រឿងញៀន ទូទាំងប្រទេស កាលពីទី២៣ ខែកុម្ភៈ និងដកហូតបានសារធាតុញៀនមួយចំនួន។

របាយការណ៍របស់អគ្គស្នងការដ្ឋាន នគរបាលជាតិ បានឱ្យដឹងថា កាលពីថ្ងៃទី២៣ ខែកុម្ភៈ សមត្ថកិច្ចបានឃាត់ខ្លួនជនសង្ស័យ ចំនួន៣៦នាក់ (ស្រី២នាក់) ក្នុងប្រតិបត្តិការបង្ក្រាបបទល្មើសគ្រឿងញៀន ចំនួន១៩ករណី ទូទាំងប្រទេស។

របាយការណ៍បានឱ្យដឹងដែរថា ក្នុងចំណោមជនសង្ស័យទាំង៣៦នាក់ រួមមាន ៖ ជួញដូរ ១៣ករណី ឃាត់ ២៦នាក់,ប្រើប្រាស់៣ករណី ឃាត់ ៧នាក់ និងដឹកជញ្ជូន រក្សាទុក ៣ករណី ឃាត់៣នាក់ ។

ជាមួយគ្នានេះ សមត្ថកិច្ចចាប់យកវត្ថុតាងសរុប រួមមាន៖មេតំហ្វេតាមីន (Ice) = ២៤១,៥៥ក្រាម និង២១កញ្ចប់តូច,កេតាមីន (Ke) = ២៨,៩០ក្រាម,អ៊ិចស្តាស៊ី (mdma) = ១៣,៦៥ក្រាម និងកញ្ឆា១៥០០,០ក្រាមផងដែរ។

នៅក្នុងពិធីសន្និបាតបូកសរុបលទ្ធផលការងារឆ្នាំ២០២១ និងលើកទិសដៅបន្ដរបស់ក្រសួងមហាផ្ទៃ នាថ្ងៃទី២៣ ខែកុម្ភៈ ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានណែនាំដល់អង្គភាពពាក់ព័ន្ធឱ្យធ្វើការរួមគ្នាលុបបំបាត់បញ្ហាគ្រឿងញៀននៅកម្ពុជា។

សម្ដេចក្រឡាហោម ស ខេង បានកត់សម្គាល់ថា តាមការវាយតម្លៃទូទៅ និន្នាការនៃការផលិត ការចរាចរជួញដូរគ្រឿងញៀនខុសច្បាប់ជាសកល ជាពិសេសគ្រឿងញៀនសំយោគកាន់តែមានការកើនឡើង ហើយបានជះឥទ្ធិពលមកលើប្រទេសក្នុងតំបន់ ក្នុងនោះរួមទាំងកម្ពុជាផងដែរ៕