ភ្នំពេញ ៖ ផ្ទះចំនួន១៣ខ្នង បានរងការឆាបឆេះអស់ទាំងស្រុង និងទ្រព្យសម្បត្តិមួយចំនួនទៀតបានខូចខាត និងបាត់បង់ ដោយសារគ្រោះអគ្គិភ័យ កាលពីវេលាម៉ោង១ និង១៥នាទីយប់រំលងអាធ្រាត ឈានចូលថ្ងៃទី២៤ ខែកុម្ភៈ ឆ្នាំ២០២២ នៅចំណុចផ្លូវបេតុង ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

នគរបាលបង្ការពន្លត់អគ្គិភ័យ និងសង្គ្រោះ បានឱ្យដឹងថា ករណីអគ្គិភ័យនេះ បណ្តាលឲ្យឆេះផ្ទះប្រជាពលរដ្ឋចំនួន ១៣ខ្នងផ្ទះ និងបានបំផ្លាញសម្ភារអស់ទាំងស្រុង រួមទាំងម៉ូតូចំនួន២គ្រឿងផងដែរ។ 

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះបានប្រាប់ឲ្យដឹងថា នៅក្នុងរង្វង់ នៃប្រតិបត្តិការនេះ កម្លាំងសមត្ថកិច្ចបានប្រើប្រាស់ រថយន្ដពន្លត់អគ្គិភ័យ ចំនួន ១២គ្រឿង ក្នុងនោះការិយាល័យបង្ការ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ ចំនួន ៣គ្រឿង ប្រើប្រាស់ទឹកអស់ ៧ឡាន និងរថយន្តក្រុមហ៊ុន OCIC ជ្រោយចង្វារ ចំនួន ៩គ្រឿង ប្រើប្រាស់ទឹកអស់ ៩ឡាន និងពុំបណ្តាលឲ្យមានអ្នកណាម្នាក់រងរបួសឡើយ។

សូមបញ្ជាក់ថា ប្រតិបត្តិការនេះ ត្រូវបានកម្លាំងសមត្ថកិច្ចគ្រប់គ្រងបាននៅវេលាម៉ោង២ និង១៥នាទី ខណៈមូលហេតុដែលនាំឲ្យមានអគ្គិភ័យ គឺបណ្តាលមកពីការឆ្លងចរន្តអគ្គីសនី៕