ភ្នំពេញ៖ រដ្ឋមន្រ្តីក្រសួងមហាផ្ទៃ បានលើកទឹកចិត្តដល់អាជ្ញាធរមូលដ្ឋាន ឱ្យខិតខំដោះស្រាយបញ្ហាជូនដល់ប្រជាពលរដ្ឋ ដើម្បីបង្កភាពកក់ក្តៅជូនពួកគាត់ និងមិនត្រូវបោះចោលនូវបញ្ហាណាមួយនោះទេ។

មានប្រសាសន៍ក្នុងសន្និបាតត្រួតពិនិត្យលទ្ធផលការងារ របស់ក្រសួងមហាផ្ទៃ នាព្រឹកថ្ងៃទី២៣ ខែកុម្ភៈ ឆ្នាំ២០២២នេះ សម្តេច ក្រឡាហោម ស ខេង រដ្ឋមន្រ្តីក្រសួងមហាផ្ទៃ បានលើកឡើងថា ប្រជាពលរដ្ឋមួយចំនួនមិនមានភាពកក់ក្តៅជាមួយអាជ្ញាធរមូលដ្ឋាន ខណៈការដោះស្រាយបញ្ហាខ្លះមិនមានដំណោះស្រាយ។

ជុំវិញបញ្ហានេះ សម្តេច ក្រឡាហោម ស ខេង បានស្នើដល់បណ្ដារាជធានី ខេត្ត និងអង្គភាពក្រោមឱវាទ ក្រសួងមហាផ្ទៃ ត្រូវទំនាក់ទំនងជាមួយប្រជាពលរដ្ឋ ដើម្បីដោះស្រាយនៅនឹងកន្លែង និងមិនត្រូវបោះចោលនូវបញ្ហាណាមួយនោះទេ។របាយការណ៍របស់ក្រសួងមហាផ្ទៃ បានឱ្យដឹងថា ក្នុងឆ្នាំ២០២១កន្លងទៅ ការិយាល័យប្រជាពលរដ្ឋ នៃរដ្ឋបាលរាជធានី-ខេត្ត ទាំង២៥គោលដៅ បានទទួលបណ្តឹង និងព័ត៌មានផ្សេង ចំនួន១.៤១៧ករណី ក្នុងនោះបណ្តឹងក្នុងសមត្ថកិច្ច ៨៨៥ករណី បណ្តឹងក្រៅសមត្ថកិច្ច ចំនួន ២៧០ករណី និងព័ត៌មានផ្សេងៗ ចំនួន ៣៣ករណី។ 

ដោយឡែកការិយាល័យប្រជាពលរដ្ឋ ក្រុង ស្រុក ខណ្ឌ ១២០គោលដៅ ទទួលបានបណ្តឹង និងព័ត៌មានផ្សេងៗ បានចំនួន១១.៩០៩ករណី ក្នុងនោះបណ្តឹងក្នុងសមត្ថកិច្ច ៣០៥ករណី     បណ្តឹងក្រៅសមត្ថកិច្ច ២១៨ករណី និងព័ត៌មានផ្សេងៗ១១.៣៨៦ ករណី៕

អត្ថបទ៖លាង ឡា