ភ្នំពេញ៖ អាជ្ញាធររាជធានីភ្នំពេញ បានណែនាំដល់អតីតបុគ្គលិកក្រុមហ៊ុន ណាហ្គាវើលដ៍ ឱ្យទៅយកសំណាករកជំងឺកូវីដ-១៩ លើកទី២ នឹងព្រមានអនុវត្តវិធានការសុខាភិបាល ប្រសិននៅរឹងរូសមិនស្ដាប់តាមការណែនាំរបស់អាជ្ញាធរ។
សេចក្ដីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា កាលពីថ្ងៃទី២១ ខែកុម្ភៈ ឆ្នាំ២០២២ អតីតបុគ្គលិកក្រុមហ៊ុន ណាហ្គាវើលដ៍ មិនអនុវត្តតាមការណែនាំ និងវិធានសុខាភិបាលផ្សេងៗ ដែលបានដាក់ចេញឡើយ ដោយពួកគេមួយចំនួននៅតែចចេសរឹងរូស ដោយបានបន្តធ្វើការជួបជុំ ប្រមូលផ្ដុំ នៅតាមទីសាធារណៈ ដោយមិនអនុវត្តតាមនីតិវិធីច្បាប់ជាធរមាន បង្កឱ្យប៉ះពាល់ដល់សន្តិសុខ សណ្តាប់ធ្នាប់ របៀបរៀបរយសាធារណៈ។
រដ្ឋបាលរាជធានីភ្នំពេញ បានលើកឡើងថា ខ្លួនគ្មានជម្រើសអ្វីក្រៅពីអនុវត្តវិធានការរដ្ឋបាល ដោយបានអញ្ជើញពួកគេដែលបានប្រមូលផ្ដុំចំនួន ៦៤នាក់ នៅមជ្ឈមណ្ឌលចត្តាឡីស័ករាជធានីភ្នំពេញ ដើម្បីបន្តផ្ទៀងផ្ទាត់ពិនិត្យរកឈ្មោះអ្នក ដែលមិនទាន់បានយកសំណាកលើកទី២ ទៅបន្តធ្វើតេស្តរកវីរុសកូវីដ-១៩ និងណែនាំដល់ពួកគេដែលបានប៉ះពាល់គ្នា ធ្វើតេស្តជាបន្តបន្ទាប់តាមវិធានសុខាភិបាល។
រដ្ឋបាលរាជធានីភ្នំពេញ បានស្នើសុំក្រុមបាតុករ ចូលរួមសហការជាមួយអាជ្ញាធរមានសមត្ថកិច្ចពាក់ព័ន្ធ ដើម្បីធានាបាននូវសុខភាពសាធារណៈ សន្តិសុខ សណ្តាប់ធ្នាប់របៀបរៀបរយ និងបញ្ចៀសការកកស្ទះចរាចរណ៍ ព្រមទាំងការរំខានដល់ការប្រកបរបរអាជីវកម្ម និងកិច្ចការងារប្រចាំថ្ងៃរបស់ប្រជាពលរដ្ឋដទៃទៀត។
សូមបញ្ជាក់ថា នាពេលថ្មីៗនេះ អាជ្ញាធរបានរកឃើញករណីវិជ្ជមានកូវីដ-១៩ ជាបន្តបន្ទាប់លើអតីតបុគ្គលិកក្រុមហ៊ុន ណាហ្គាវើលដ៍ ដែលប្រមូលផ្តុំគ្នាទាមទារលក្ខខណ្ឌការងារពីក្រុមហ៊ុន ណាហ្គាវើលដ៍៕
