ភ្នំពេញ៖ មន្រ្តីជំនាញនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ( CCF ) បានពិន័យលើម្ចាស់ស្ថានីយ/ដេប៉ូប្រេងឥន្ធនៈ ចំនួន១០កន្លែង ក្រោយពេលពិនិត្យរកឃើញនូវអំពើមិនសុចរិត។

របាយការណ៍របស់អគ្គនាយកដ្ឋាន ការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ( CCF ) បានឱ្យដឹងថា នាអំឡុងថ្ងៃទី១៩ ខែកុម្ភៈ ឆ្នាំ២០២២ម្សិលមិញ មន្រ្តីជំនាញបានចុះពិនិត្យលើស្ថានីយ/ដេប៉ូប្រេងឥន្ធនៈ ចំនួន២១ទីតាំង និងបានរកឃើញអំពើមិនសុចរិតលើ១០ដេប៉ូប្រេង។

អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ បានឱ្យដឹងបន្តថា ប្រតិបត្តិការចុះត្រួតពិនិត្យអនុលោមភាពនេះ បានធ្វើឡើងនៅតាមបណ្តាស្ថានីយ/ដេប៉ូប្រេងឥន្ធនៈ ស្ថិតក្នុងខេត្តកំពង់ស្ពឺ ខេត្តព្រៃវែង ខេត្តសៀមរាប និងខេត្តបាត់ដំបង។

ជាមួយគ្នានេះ ម្ចាស់ដេប៉ូដែលប្រព្រឹត្តល្មើស ត្រូវបានមន្ត្រីជំនាញចាត់វិធានការពិន័យអន្តរការណ៍នៅនឹងកន្លែង និងបានតម្រូវឱ្យធ្វើកិច្ចសន្យាបញ្ចប់ការរកស៊ីកេងប្រវ័ញ្ចដោយចេតនានិងអចេតនា ពីអតិថិជនដែលជាអ្នកប្រើប្រាស់ផងដែរ៕