លោក Juan Orlando Hernandez អតីតប្រធានាធិបតីហុងឌូរ៉ាស ត្រូវបានចាប់ខ្លួនពីបទចោទប្រកាន់ទាក់ទងនឹងការជួញដូរគ្រឿងញៀន។ ប៉ូលីសត្រូវបានគេដាក់ពង្រាយទៅផ្ទះរបស់គាត់ក្នុងរដ្ឋធានី Tegucigalpa ប៉ុន្មានម៉ោងបន្ទាប់ពីសហរដ្ឋអាមេរិកបានស្នើសុំការធ្វើបត្យាប័នរបស់គាត់ដើម្បីការពារគាត់ពីការចាកចេញ។ ពួកគេបានចូលចាប់ខ្លួនគាត់នៅពេលមានដីកាចាប់ខ្លួន។ គាត់បានចុះចូល ហើយត្រូវបានគេនាំខ្លួនចេញពីផ្ទះដោយជាប់ខ្នោះដៃ។

លោក Hernandez បានគ្រប់គ្រងប្រទេសហុងឌូរ៉ាសពីឆ្នាំ 2014 ដល់ខែមករាឆ្នាំនេះ។ លោកបដិសេធការចោទប្រកាន់លើរូបលោក។ គាត់ត្រូវបានចោទប្រកាន់ថា បានជាប់ពាក់ព័ន្ធក្នុងសង្វៀនជួញដូរគ្រឿងញៀន ដែលរួមមានប្អូនប្រុសរបស់គាត់គឺ Tony Hernández ដែលកាលពីឆ្នាំមុនត្រូវបានកាត់ទោសនៅសហរដ្ឋអាមេរិកឱ្យជាប់ពន្ធនាគារអស់មួយជីវិត។

នៅក្នុងអំឡុងពេលសវនាការរបស់ Tony Hernández ព្រះរាជអាជ្ញាបានចោទប្រកាន់ថា ស្តេចគ្រឿងញៀនម៉ិកស៊ិកដ៏ល្បីល្បាញ Joaquín "El Chapo" Guzmán បានប្រគល់ប្រាក់ឱ្យ Tony Hernández ផ្ទាល់ខ្លួនចំនួន 1 លានដុល្លារ។ យោងតាមព្រះរាជអាជ្ញា, "El Chapo" Guzmán បានប្រាប់ Tony Hernández ឱ្យប្រគល់ប្រាក់ទៅឱ្យបងប្រុសរបស់គាត់ឈ្មោះ Juan Orlando ជាសំណូក។

ហុងឌូរ៉ាស ជាប្រទេសឆ្លងកាត់ដ៏សំខាន់សម្រាប់ការជួញដូរគ្រឿងញៀនអស់រយៈពេលជាច្រើនឆ្នាំមកហើយ ដែលជាការរត់ពន្ធពីអាមេរិកខាងត្បូងទៅកាន់សហរដ្ឋអាមេរិក ហើយថ្មីៗនេះក៏បានក្លាយជាកន្លែងផលិតកូកាអ៊ីនផងដែរ។

Juan Orlando Hernández តែងតែអះអាងថា គាត់ធ្វើអ្វីៗគ្រប់យ៉ាងតាមអំណាចរបស់គាត់ ដើម្បីប្រយុទ្ធប្រឆាំងនឹងការជួញដូរគ្រឿងញៀន ហើយក្នុងអំឡុងពេលរដ្ឋបាលប្រធានាធិបតី Donald Trump គាត់រីករាយនឹងការគាំទ្រពីរដ្ឋាភិបាលសហរដ្ឋអាមេរិក។ ប៉ុន្តែទំនាក់ទំនងរបស់លោកជាមួយអាមេរិកបានឃ្លាតឆ្ងាយគ្នាក្រោមរដ្ឋាបាលរបស់ប្រធានាធិបតី Joe Biden។

កាលពីសប្តាហ៍មុន ក្រសួងការបរទេសសហរដ្ឋអាមេរិកបានបង្ហាញថា លោក Hernández ត្រូវបានបញ្ចូលទៅក្នុងបញ្ជីឈ្មោះ ដែលត្រូវបានហាមឃាត់មិនឱ្យចូលសហរដ្ឋអាមេរិក ជុំវិញសកម្មភាពពុករលួយ។

នៅក្នុងសេចក្តីថ្លែងការណ៍មួយ រដ្ឋមន្ត្រីការបរទេសអាមេរិក លោក Antony Blinken បាននិយាយថា មានរបាយការណ៍ "គួរឱ្យទុកចិត្ត" ដែលថា អតីតមេដឹកនាំហុងឌូរ៉ាស "បានប្រព្រឹត្តអំពើពុករលួយយ៉ាងសំខាន់ ដោយប្រព្រឹត្ត ឬសម្របសម្រួលអំពើពុករលួយ ការជួញដូរគ្រឿងញៀន និងប្រើប្រាស់ប្រាក់ចំណូលពីសកម្មភាពខុសច្បាប់ ដើម្បីជួយសម្រួលយុទ្ធនាការនយោបាយ"។

លោក Hernández បានឆ្លើយតបទៅនឹងការលើកឡើងរបស់លោក Blinken ដោយនិយាយថា ការចោទប្រកាន់ប្រឆាំងនឹងគាត់ គឺផ្អែកលើសេចក្តីថ្លែងការណ៍ដែលផ្តល់ដោយអ្នកជួញដូរគ្រឿងញៀនដែលត្រូវបានកាត់ទោស ដែលគាត់និយាយថា ជាការសងសឹក។ មេធាវីរបស់គាត់បានប្រកែកថា គាត់មានអភ័យឯកសិទ្ធិពីការចាប់ខ្លួនដោយសារតែគាត់ជាសមាជិកសភាអាមេរិកកណ្តាល។

ប៉ុន្តែអ្នកជំនាញផ្នែកច្បាប់និយាយថា អភ័យឯកសិទ្ធិដែលផ្តល់ដោយស្ថាប័នប្រចាំតំបន់អាចត្រូវបានដកចេញ ប្រសិនបើប្រទេសកំណើតរបស់សមាជិកបានស្នើសុំ៕

អត្ថបទដកស្រង់ពី BBC

បកប្រែនិងកែសម្រួលដោយ Mr.Blue