ភ្នំពេញ៖ នៅតំបន់នានាក្នុងប្រទេសកម្ពុជា នឹងបន្តមានភ្លៀងធ្លាក់ដោយអន្លើ ដែលបណ្តាលមកពីឥទ្ធិពលនូវជ្រលងសម្ពាធទាប ចាប់ពីថ្ងៃទី១៦ ដល់ថ្ងៃទី២២ ខែកុម្ភៈ ឆ្នាំ២០២២។

យោងតាមប្រកាសរបស់ក្រសួងធនធានទឹក និងឧតុនិយម បានឱ្យដឹងថា ក្នុងសប្ដាហ៍ខាងមុខកម្ពុជានឹងទទួលនូវឥទ្ធិពលពីជ្រលងសម្ពាធទាបពី (ប្រទេសឥណ្ឌូនេស៊ី និងឥណ្ឌា) ក្នុងកម្រិតពីខ្សោយទៅមធ្យម ហើយនឹងអាចកើតមានឡើងនូវសម្ពាធទាបតូចៗជាលក្ខណៈ ឡូកាល់ (Local) ដោយអន្លើផងដែរ។

ក្រសួងធនធានទឹក និងឧតុនិយម បានឱ្យដឹងបន្តថា ស្ថានភាពបែបនេះ នឹងធ្វើឲ្យបណ្តាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមា ពី ២២-២៥ អង្សាសេ និងសីតុណ្ហភាពអតិបរមា ពី ៣២-៣៤ អង្សាសេ ហើយអាចមានភ្លៀង ក្នុងកម្រិតពីតិចទៅបង្គួរជាទូទៅលាយឡំនិងផ្គរ រន្ទះ។ ក្នុងនោះខេត្តកំពង់ធំ, កំពង់ឆ្នាំង, ពោធិ៍សាត់, បាត់ដំបង, បន្ទាយមានជ័យ និងប៉ៃលិន អាចមានភ្លៀងច្រើនដោយអន្លើ។

ក្រសួងបន្តទៀតថា នៅបណ្តាខេត្តដាប់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមា ពី ២១-២៤ អង្សាសេ និងសីតុណ្ហភាពអតិបរមា មានពី ៣១-៣៣ អង្សាសេ ហើយអាចមានភ្លៀង ក្នុងកម្រិតពីតិចទៅមធ្យមលាយឡំនិងផ្គរ រន្ទះ។

ជាមួយគ្នានេះ ក្រសួងបញ្ជាក់ថា នៅតំបន់មាត់សមុទ្រ សីតុណ្ហភាពអប្បបរមាពី ២៣-២៥ អង្សាសេ និងសីតុណ្ហភាពអតិបរមា មានពី ៣០-៣២អង្សាសេ ហើយអាចមានភ្លៀង ក្នុងកម្រិតពីតិចទៅបង្ហូរលាយឡំនិងផ្គរ រន្ទះ។

កាលពីថ្ងៃទី២ ខែកុម្ភៈ ឆ្នាំ២០២២ ក្រសួងធនធានទឹក និងឧតុនិយម ធ្លាប់បានប្រកាសថា ក្នុងរដូវប្រាំងឆ្នាំនេះ បរិមាណទឹកភ្លៀង អាចនឹងមានកម្រិតខ្ពស់ជាងមធ្យមភាគច្រើនឆ្នាំ និងច្រើនជាងឆ្នាំ ២០២១ ខណៈចាប់ពីខែកុម្ភៈ រហូតដល់ដើមខែឧសភា នឹងអាចមានភ្លៀងកក់ខែពីមធ្យមទៅច្រើន៕

អត្ថបទ៖លាង ឡា