ស្ទឹងត្រែង៖ បុរសជនជាតិឡាវម្នាក់ ពាក់ព័ន្ឋនឹងថ្នាំញៀនប្រមាណ១០គីឡូ ត្រូវបានសមត្ថកិច្ចនគរបាលខេត្តស្ទឹងត្រែង ឃាត់ខ្លួន កាលពីថ្ងៃទី១៣ ខែកុម្ភៈ ឆ្នាំ២០២២ នៅចំណុចផ្លូវស្ពានទី២ ស្ថិតក្នុងភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ។
សមត្ថកិច្ចខេត្តស្ទឹងត្រែង បានឱ្យដឹងថា ជនសង្ស័យមានឈ្មោះ ភីម ម៉ាន់ចាន់កាន់ អាយុ២៤ឆ្នាំ ជនជាតិជាតិឡាវ រស់នៅភូមិថាកាំង ស្រុកបុន ខេត្តចំប៉ាសាក ត្រូវបានឃាត់ខ្លួននៅចំណុចផ្លូវស្ពានទី២ ស្ថិតក្នុងភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង ។
នគរបាលដដែលបន្តថា ការចាប់បុរសជាជនសង្ស័យខាងលើនេះ ពាក់ព័ន្ធក្នុងបទល្មើសជាក់ស្តែង លួចដឹកជញ្ជូនសារធាតុខុសច្បាប់ ចូលប្រទេសកម្ពុជា តាមព្រៃ មកចំណុចកើតហេតុខាងលើ។
សមត្ថកិច្ចធ្វើការឆែកឆេរ និងរកឃើញវត្ថុតាង ម្ស៉ៅក្រាម សថ្លា ចំនួន១០កញ្ចប់ធំ ដោយសង្ស័យថា ជាសារធាតុញៀន។
បច្ចុប្បន្នជនសង្ស័យត្រូវបានសមត្ថកិច្ចសាកសួរបន្តដើម្បីចាត់ការតាមនីតិវិធីច្បាប់៕
