Wellington-AP-

សហរដ្ឋអាមេរិកនិយាយថា ខ្លួននឹងបើកស្ថានទូតមួយនៅលើកោះសឡូម៉ុង ដាក់ចេញនូវផែនការមិនធម្មតាមួយដែលអាចនិយាយបានថាខ្វះការគួរសម ដើម្បីបង្កើននូវឥទ្ធិពលរបស់ខ្លួននៅក្នុងប្រជាជាតិអាស៊ីប៉ាស៊ីហ្វីក មុនពេលដែលចិនបង្កប់ភាពខ្លាំងក្លានៅទីនោះ។ ហេតុផលត្រូវបានពន្យល់នៅក្នុងសេចក្តីបញ្ជាក់ របស់ក្រសួងការបរទេសចំពោះសភា ដែលទទួលបានដោយទីភ្នាក់ងារសារព័ត៌មាន AP ។ វាបានលេចចេញមកខណៈដែលលោករដ្ឋមន្ត្រីក្រសួងការបរទេស Antony Blinken បានឈប់សុំចតនៅលើកោះ Fiji កាលពីថ្ងៃសៅរ៍ ពាក់កណ្តាលផ្លូវនៃដំណើរទស្សនកិច្ចក្នុងប៉ាស៊ីហ្វីក ដែលចាប់ផ្តើមពីប្រទេសអូស្ត្រាលីនិងបញ្ចប់នៅកោះហាវៃ។

ក្រសួងការបរទេសបាននិយាយថា ពលរដ្ឋលើកោះសូឡូម៉ុងបានថែររក្សាប្រវត្តិសាស្ត្ររបស់ពួកគេជាមួយអាមេរិកលើសមរភូមិនៃសង្រ្គាមលោកលើកទី២ ប៉ុន្តែគឺសហរដ្ឋអាមេរិកដែលស្ថិតនៅក្នុងគ្រោះថ្នាក់ក្នុងការបាត់បង់នូវចំណងទាក់ទងដែលជាទីពេញចិត្ត ខណៈដែលចិនបានបុករុកស្វែងរកការពាក់ព័ន្ធជាមួយនឹងអ្នកនយោបាយ និងអ្នករកស៊ីនៅលើកោះសូឡូម៉ុង។ ទង្វើរនេះបានលេចចេញមកបន្ទាប់ពីមានកុបកម្មដែលរង្គោះរង្គើរប្រជាជាតិមានមនុស្សចំនួន ៧០០,០០០នាក់ក្នុងខែវិច្ឆិកា។ កុបកម្មបានរីកធំឡើងពីការតវ៉ាដោយសន្តិវិធីនិងបានបញ្ចេញនូវការប្រកួតប្រជែងក្នុងតំបន់, បញ្ហាសេដ្ឋកិច្ចនិងការខ្វាយខ្វល់ពីការកើនឡើងនៃទំនាក់ទំនងរបស់ប្រទេសជាមួយនិងចិន។

នាយករដ្ឋមន្ត្រីកោះសូឡូម៉ុង លោក Manasseh Sogavare បានគេចផុតពីការបោះឆ្នោតមិនទុកចិត្តក្នុងសភា១ខែបន្ទាប់មក ដោយបាននិយាយប្រាប់សភាថា លោកមិនបានធ្វើអ្វីខុសនោះទេ ហើយនឹងមិនឱនក្បាលចំពោះ "កម្លាំងបីសាច" ឬ “ភ្នាក់ងាររបស់តៃវ៉ាន់នោះទេ”។ សហរដ្ឋអាមេរិកពីពេលមុនបានបើកនូវស្ថានទូតមួយនៅក្នុងកោះសូឡូម៉ុងអស់រយះពេល៥ឆ្នាំ មុនពេលដែលបានបិទនៅក្នុងឆ្នាំ១៩៩៣។ ចាប់តាំងពីពេលនោះមក អ្នកការទូតអាមេរិកដែលនៅជិតខាង ក្នុងប្រទេស New Papua Guinea ជាអ្នកទទួលខុសត្រូវផ្នែកការទូតលើកោះសូឡូម៉ុង។

ការប្រកាសបើកស្ថានទូតស្របគ្នាទៅនឹងយុទ្ធសាស្ត្រនៃរដ្ឋការលោក Biden សំរាប់ឥណ្ឌូ-ប៉ាស៊ីហ្វីកដែលបានប្រកាសកាលពីថ្ងៃសុក្រ និងបានបញ្ជាក់ពការស្ថាបនាភាពជាដៃគូរជាមួយនឹងសម្ព័ន្ធមិត្តនៅក្នុងតំបន់ ដែលជាមធ្យោបាយមួយដើម្បីប្រឆាំងទៅនឹងការរីកដុះដាលនៃឥទ្ធិពល និងមហិច្ឆិតាចិន។ នៅក្នុងការបញ្ជាក់របស់ខ្លួនទៅកាន់សភា ក្រសួងការបរទេសអាមេរិកបាននិយាយថា ចិនបានប្រើប្រាស់គំរូស្រដៀងគ្នាក្នុងការសន្យាជះលុយ, កម្ចីសំរាប់ហេដ្ឋារចនាសម្ព័ន្ធដែលមានតម្លៃថ្លៃ និងបំណុលដែលមានកំរិតគ្រោះថ្នាក់៕