កំពង់ស្ពឺ ៖ កម្មករជាច្រើននាក់ បានរងរបួសធ្ងន់ និងស្រាល នៅក្នុងហេតុការណ៍ក្រឡាប់រថយន្ត កាលពីវេលាម៉ោង៦ និង២៥នាទី ត្រង់ចំណុចភូមិពង្រ ឃុំស្រង់ ស្រុកគងសី ខេត្តកំពង់ស្ពឺ នៅព្រឹកថ្ងៃសៅរ៍ ទី១២ ខែកុម្ភៈ ឆ្នាំ២០២២។

សមត្ថកិច្ចនគរបាល ខេត្តកំពង់ស្ពឺ បានឱ្យដឹងថា រថយន្ដដឹកកម្មករ បង្កគ្រោះថ្នាក់ក្រឡាប់ ម៉ាក ហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3D-1938 បើកបរដោយឈ្មោះ ឯក សាម៉ន ភេទប្រុស អាយុ ៣៤ ឆ្នាំ រស់នៅភូមិអូតាវាម ឃុំស្រង់ ស្រុកគងពិសី បានរេចង្កូតធ្លាក់ចូលប្រឡាយទឹក ។

អធិការនគរបាលស្រុកគងពិសី បានឱ្យដឹងថា រថយន្តដឹកកម្មករ កម្មការិនីខាងលើបើកបរពីទិសខាងលិច ទៅទិសខាងកើត លុះបើកបរមកដល់ចំណុចខាងលើ បានដាច់ម៉ែត្រចង្កូត បណ្ដាលឱ្យរថយន្ដរេចង្កូតរួចធ្លាក់ប្រឡាយទឹកដោយខ្លួនឯងតែម្តង។

ក្នុងករណីនេះ បានបង្កឱ្យខូចខាតសម្ភាររថយន្ត និងរងរបួសអ្នកដំណើរជាកម្មករ កម្មការិនីដែលជិះលើរថយន្ដ ក្នុងនោះ របួសធ្ងន់៣នាក់ និងបង្ករបួសស្រាល ២៨នាក់។ 

ភ្លាមៗសមត្ថកិច្ច បានជួយអន្ដរាគមន៍សម្របសម្រួលនិងបញ្ជូនអ្នករបួសទៅមន្ទីរពេទ្យសង្រ្គោះបន្ទាន់ និងចំណាត់ការស្រាវជ្រាវរកបុគ្គលជាតៃកុងឡានមកទទួលខុសត្រូវតាមផ្លូវច្បាប់ ៕

អត្ថបទ៖លាង ឡា