កំពង់ឆ្នាំង៖ ឧបករណ៍ឆក់ត្រី ដែលច្បាប់បានហាមឃាត់ ត្រូវបានប្រជាពលរដ្ឋមួយចំនួនរស់នៅក្នុងខេត្តកំពង់ឆ្នាំង បានស្ម័គ្រចិត្តយកទៅប្រគល់ជូនអាជ្ញាធរ តាមស្មារតីភ្ញាក់រលឹក ដើម្បីជៀសវាងនូវទោសទណ្ឌនានា។
តាមរបាយការណ៍របស់អាជ្ញាធរ ខេត្តកំពង់ឆ្នាំង បានឱ្យដឹងថា ចាប់តាំងពីថ្ងៃទី៣ ខែកុម្ភៈ ឆ្នាំ២០២២ ប្រជាពលរដ្ឋបានប្រគល់ឧបករណ៍ឆក់ត្រី (អាំងវែទ័រ) ចំនួន១៩២គ្រឿង ក្នុងនោះក៏មានឧបករណ៍ឆក់ត្រជាក់៨គ្រឿងផងដែរ។
លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង បានឱ្យដឹងថា កម្លាំងអធិការដ្ឋាននគរបាលស្រុកកំពង់លែង និងកម្លាំងប៉ុស្តិ៍រដ្ឋបាលទាំងអស់ក្នុងស្រុក បានចុះផ្សព្វផ្សាយណែនាំឱ្យប្រជាពលរដ្ឋដែលកំពុងប្រព្រឹត្តិបទល្មើសឆក់ត្រី ស្ម័គ្រចិត្តប្រគល់ឧបករណ៍ឆក់ត្រីទាំងឆក់ក្តៅ និងឆក់ត្រជាក់ជូនសមត្ថកិច្ចវិញ ដើម្បីនាំគ្នាថែរក្សាឱ្យខាងតែបាន នូវពូជត្រីទឹកសាបឱ្យមាននិរន្តរភាព។
កាលពីពេលថ្មីៗនេះ លោក សុខ ទូច ប្រធានរាជបណ្ឌិត្យសភាកម្ពុជា បានជំរុញដល់អាជ្ញាធរតាមបណ្តាខេត្តជុំវិញបឹងទន្លេសាប និងរដ្ឋបាលជលផល ឱ្យពង្រឹងការចុះល្បាតស្រាវជ្រាវទប់ស្កាត់ និងបង្ក្រាប អ្នកឆក់ត្រី ក្នុងបឹងទន្លេសាប។
លោកបានអះអាងថា តាមរយៈបទល្មើសឆក់ត្រីនេះ បានធ្វើឱ្យរាជរដ្ឋាភិបាល បាត់ប្រាក់ចំណូលប្រមាណ១ម៉ឺនដុល្លារ ក្នុង១យប់។
លោកសុខ ទូច ធ្លាប់បានកត់សម្គាល់ថា បទល្មើសឆក់ត្រីក្នុងតំបន់ជុំវិញបឹងទន្លេសាប ភាគច្រើនកើតឡើងនៅពេលយប់ គឺចន្លោះពីម៉ោង៦យប់ ដល់ម៉ោង៦ព្រឹក ហើយអ្នកប្រព្រឹត្តតែងប្រើកាណូត២ផ្គួបគ្នា អូសយកត្រី និងខ្លះមានភ្ជាប់ឧបករណ៍ឆក់ត្រជាក់ទៀតផង៕
