ភ្នំពេញ៖ ជនជាប់ឃុំចំនួនជាង៣ម៉ឺននាក់ ត្រូវបានរាយការណ៍ថា បានទទួលវ៉ាក់សាំងដូស ទី៣ ប្រឆាំងជំងឺកូវីដ-១៩ ខណៈការឆ្លង និងករណីស្លាប់ថ្មី នៃជំងឺកូវីដ-១៩ លើជនជាប់ឃុំ នៅពុំមានតួលេខនៅឡើយទេ។
លោក នុត សវនា អ្នកនាំពាក្យ អគ្គនាយកដ្ឋានពន្ឋនាគារ នៃក្រសួងមហាផ្ទៃ បានឱ្យដឹងថា ក្រោមកិច្ចខិតខំរបស់រាជរដ្ឋាភិបាលកម្ពុជា ជនជាប់ឃុំជាង៨០ភាគរយ ឬជាង ៣ម៉ឺននាក់ បានទទួលវ៉ាក់សាំងដូស ទី៣ ប្រឆាំងជំងឺកូវីដ-១៩។ជាមួយគ្នានេះ លោកបានបញ្ជាក់ដែរថា មន្ត្រីស្ទើរ១០០ភាគរយ បានទទួលវ៉ាក់សាំងដូសទី៤ រួចហើយដែរ។
ក្នុងរបាយការណ៍កាលពីឆ្នាំ២០២១កន្លងទៅ បានឱ្យដឹងថា កម្ពុជាមានអ្នកជាប់ឃុំសរុបទូទាំងប្រទេសប្រមាណ៣៩០០០នាក់ ហើយមានពន្ធនាគារប្រមាណ១០ ត្រូវបានរកឃើញករណីឆ្លងជំងឺកូវីដ-១៩ ក្នុងនោះមានដូចជា ពន្ធនាគារខេត្តព្រះសីហនុ ពន្ធនាគាររាជធានីភ្នំពេញ (PJ) មណ្ឌលអប់រំកែប្រែ "ម១" "ម២" ខេត្តកណ្ដាល ខេត្តកំពង់ស្ពឺ ខេត្តស្វាយរៀង និងខេត្តតាកែវ ជាដើម។
អគ្គនាយកដ្ឋានពន្ធនាគារ ធ្លាប់បានឱ្យដឹងដែរថា ការផ្ទុះរីករាលដាលជំងឺកូវីដ-១៩ ចូលក្នុងសហគមន៍ ពន្ធនាគារ ត្រូវបានរកឃើញមានការឆ្លងក្នុងចំណោមជនជាប់ឃុំក្នុងកម្រិតផ្សេងៗគ្នា ដោយនៅកន្លែងនីមួយៗមានពី១០ ទៅ ២០ភាគរយ នៃចំនួនជនជាប់ឃុំ៕
