ភ្នំពេញ៖ ឧកញ៉ា ឌួង ងៀប ដែលជាអ្នកជំនួញដ៏ល្បី និងជាមន្រ្តីជាន់ខ្ពស់ក្រសួងមហាផ្ទៃ នាថ្ងៃទី៨ ខែកុម្ភៈ ឆ្នាំ២០២២ម្សិលមិញ បានបង្ហាញខ្លួនដ៏ភ្ញាក់ផ្អើលនៅច្រកចូលពន្ឋនាគារព្រៃ ស ក្រោយពេលប្រកាសកើតទុក្ខមិនសុខចិត្តលើបញ្ហាមិនប្រក្រតីរបស់ចៅក្រម សាលាដំបូងរាជធានីភ្នំពេញ។
ឧកញ៉ា ឌួង ងៀប បានប្រាប់អ្នកសារព័ត៌មាន នៅមុខច្រកចូលពន្ឋនាគារព្រៃ ស ថាការដើរចូលពន្ឋនាគារនេះគឺដោយសារលោកទទួលរងនូវរឿងអយុត្តិធម៌ នៅសាលាដំបូងរាជធានីភ្នំពេញ ជុំវិញការចោទប្រកាន់លោកពីបទឆបោកប្រាក់រាប់លានដុល្លារ ពីជនជាតិតៃវ៉ាន់។
លោកបានអះអាងថា លោកពុំដែលស្គាល់ និងពុំធ្លាប់មានទំនាក់ទំនងជាមួយអ្នកប្តឹងរូបលោកឡើយហើយបែរជាសាលាដំបូងរាជធានីភ្នំពេញ ចោទប្រកាន់លោកទៅវិញខណៈបញ្ហានេះបានកើតឡើងក្រោយពីរូបលោកមានទំនាស់ជាមួយភរិយា។
ឧកញ៉ា ឌួង ងៀប លើកឡើងថា គិតមកទល់ថ្ងៃទី៨ ខែកុម្ភៈ នេះ គឺសល់តែរយៈពេលពីរថ្ងៃទៀតប៉ុណ្ណោះគឺផុតថ្ងៃនៃការកោះហៅ ហើយបើលោកមិនចូលខ្លួនទៅស្រាយបំភ្លឺទេ តុលាការនឹងចេញដីកាឃាត់ខ្លួន។
ជាមួយគ្នានេះ ឧកញ៉ា ឌួង ងៀប បានអះអាងពីភាពមិនប្រក្រតីមួយចំនួនរបស់មន្រ្តីយុត្តិធម៌ នៃសាលាដំបូងរាជធានីភ្នំពេញ ដែលបានគាបសង្កត់យកប្រាក់អស់ពីខ្លួន ហើយមិនស៊ើបអង្គេតរកយុត្តិធម៌ ជាហេតុធ្វើឱ្យលោកអស់ផ្លូវដើរនិងសម្រេចដើរចូលពន្ឋនាគារ តែម្តង។
គួរបញ្ជាក់ដែរថា កាលពីយប់ថ្ងៃទី៧ ខែកុម្ភៈ ឆ្នាំ២០២២ លោក ឌួង ងៀប បានបង្ហោះវីដេអូដ៏កម្រមួយដោយស្នើសុំសម្តេច តេជោ ហ៊ុន សែន នាយករដ្ឋមន្រ្តី ជួយរកយុត្តិធម៌ឱ្យខ្លួន និងហ៊ានទទួលខុសត្រូវទាំងស្រុងប្រសិនបើលោកបានប្រព្រឹត្តដូចការចោទប្រកាន់មែន៕
