ក្រុមហ៊ុនដឹកជញ្ជូន និងស្តុកប្រេងជាច្រើននៅទូទាំងទ្វីបអឺរ៉ុបកំពុងដោះស្រាយជាមួយនឹងការវាយប្រហារតាមប្រព័ន្ធអ៊ីនធឺណិត។ ប្រព័ន្ធ IT ត្រូវបានរំខាននៅឯ Oiltanking នៅប្រទេសអាឡឺម៉ង់, SEA-Invest នៅបែលហ្សិក, និង Evos នៅប្រទេសហូឡង់។ សរុបស្ថានីយរាប់សិបកន្លែងដែលមានកន្លែងស្តុកប្រេង និងដឹកជញ្ជូននៅជុំវិញពិភពលោកត្រូវបានរងផលប៉ះពាល់ ដោយក្រុមហ៊ុនរាយការណ៍ថា ការវាយប្រហារបានកើតឡើងកាលពីចុងសប្តាហ៍។ ប៉ុន្តែអ្នកជំនាញបានព្រមានប្រឆាំង នឹងការសន្មតថានេះជាការវាយប្រហារ ដែលមានការសម្របសម្រួល។

រដ្ឋអាជ្ញាបែលហ្ស៊ិកនិយាយថា ពួកគេកំពុងស៊ើបអង្កេតការវាយប្រហារតាមប្រព័ន្ធអ៊ីនធឺណិត ដែលប៉ះពាល់ដល់ស្ថានីយ SEA-Invest រួមទាំងក្រុមហ៊ុនដ៏ធំបំផុតនៅទីក្រុង Antwerp ដែលហៅថា SEA-Tank ។ អ្នកនាំពាក្យរបស់ក្រុមហ៊ុនបាននិយាយថា ពួកគេត្រូវបានវាយប្រហារកាលពីថ្ងៃអាទិត្យ ជាមួយនឹងកំពង់ផែទាំងអស់ដែលពួកគេដំណើរការនៅអឺរ៉ុប និងអាហ្រ្វិករងផលប៉ះពាល់។ ក្រុមហ៊ុនកំពុងធ្វើការដើម្បីទទួលបានប្រព័ន្ធ IT បម្រុងទុកតាមអ៊ីនធឺណិតមកវិញ ប៉ុន្តែនិយាយថា ការដឹកជញ្ជូនប្រេងភាគច្រើនគឺដំណើរការដូចដើម។

អ្នកនាំពាក្យរូបនេះបាននិយាយថា SEA-Invest បានដឹងអំពីការវាយប្រហារតាមអ៊ីនធឺណិតប្រឆាំងនឹងក្រុមហ៊ុនផ្សេងទៀត ប៉ុន្តែការស៊ើបអង្កេតមិនបានកំណត់ថាតើមានតំណភ្ជាប់នោះទេ។ អ្នកនាំពាក្យរបស់ Evos នៅប្រទេសហូឡង់បានប្រាប់ BBC ថាសេវាកម្ម IT នៅតាមស្ថានីយនានាក្នុង Terneuzen, Ghent និង Malta បាន "បណ្តាលឱ្យមានការពន្យារពេលខ្លះក្នុងការប្រតិបត្តិ"។

ចំណែកឯក្រុមហ៊ុន Oiltanking Deutschland GmbH & Co. KG ដែលរក្សាទុក និងដឹកជញ្ជូនប្រេង ឥន្ធនៈយានយន្ត និងផលិតផលប្រេងផ្សេងទៀត កាលពីថ្ងៃចន្ទ បាននិយាយថា  វាត្រូវបានលួចចូល។ ក្រុមហ៊ុននេះត្រូវបានបង្ខំឱ្យដំណើរការក្នុង "សមត្ថភាពមានកំណត់" ហើយកំពុងស៊ើបអង្កេតឧប្បត្តិហេតុនេះ។ របាយការណ៍មួយចំនួនបង្ហាញថា ការវាយប្រហារលើ Oiltanking គឺជា ransomware ដែលជាកន្លែងដែលពួក Hacker លួចទិន្នន័យ និងធ្វើឱ្យប្រព័ន្ធកុំព្យូទ័រមិនអាចដំណើរការបានរហូតដល់ពួកគេទទួលបានប្រាក់រំលោះ។ កាលពីខែឧសភាឆ្នាំមុន ការវាយប្រហារ ransomware លើក្រុមហ៊ុនផ្គត់ផ្គង់ប្រេងរបស់សហរដ្ឋអាមេរិក Colonial Pipeline បានឃើញការផ្គត់ផ្គង់រឹតបន្តឹងនៅទូទាំងសហរដ្ឋអាមេរិក និងរដ្ឋជាច្រើនបានប្រកាសអាសន្ន។

ការរអាក់រអួលកើតឡើង នៅពេលដែលភាពតានតឹងនៅតែមានកម្រិតខ្ពស់រវាងអ៊ុយក្រែន និងរុស្ស៊ី ហើយនៅពេលដែលមានការព្រួយបារម្ភអំពីការកើនឡើងតម្លៃថាមពល។ ប៉ុន្តែអ្នកជំនាញផ្នែកសន្តិសុខតាមអ៊ីនធឺណិតបានព្រមានប្រឆាំងនឹងការសន្និដ្ឋានថា ឧប្បត្តិហេតុជាច្រើនគឺជាលទ្ធផលនៃកិច្ចខិតខំប្រឹងប្រែងរួមគ្នាដើម្បីរំខានដល់វិស័យថាមពលអឺរ៉ុប។ លោក Brett Callow អ្នកវិភាគការគំរាមកំហែងនៅក្រុមហ៊ុនសន្តិសុខអ៊ីនធឺណិត Emsisoft បាននិយាយថា "ប្រភេទមេរោគមួយចំនួនចាប់យកអ៊ីមែល និងបញ្ជីទំនាក់ទំនង ហើយប្រើពួកវាដើម្បី spam ឯកសារ ឬតំណភ្ជាប់ដោយស្វ័យប្រវត្តិ ដូច្នេះក្រុមហ៊ុនដែលមានការតភ្ជាប់រួមគ្នា ជួនកាលអាចរងការវាយប្រហារជាបន្តបន្ទាប់" ។ ការពន្យល់ដែលអាចទៅរួចមួយទៀតអាចជា ក្រុមហ៊ុនទាំងអស់ប្រើកម្មវិធីដូចគ្នាសម្រាប់ប្រតិបត្តិការដែលអាចត្រូវបានសម្របសម្រួលដោយពួក Hacker ៕

អត្ថបទដកស្រង់ពី Joe Tidy
បកប្រែនិងកែសម្រួលដោយ Mr. Blue