មន្ទីរវប្បធម៌ និងវិចិត្រសិល្បៈខេត្តកំពង់ស្ពឺ បានបោះបង្គោលព្រំការពារស្ថានីយបុរាណមួយឈ្មោះអង្គសេះស្លាប់ ស្ថិតនៅភូមិត្បូងបឹង ឃុំវាល ស្រុកគងពីសី ហើយសកម្មភាពនេះ ធ្វើឡើងដោយសហការរវាងមន្ទីរ ជាមួយមេភូមិ អាជ្ញាធរឃុំ មន្រ្ដីការិយាល័យសង្គមកិច្ច និងសុខមាលភាពសង្គមស្រុក និងប្រជាពលរដ្ឋ។
លោក ស៊ុន មានជ័យ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ស្ពឺបានឲ្យដឹងនារសៀលថ្ងៃទី០១ ខែកុម្ភៈ នេះថា បង្គោលត្រូវតែបោះ មិនអាចអត់បានទេ ដើម្បីធ្វើជាព្រំ។ លោកថា បច្ចុប្បន្ននេះ មន្ទីរកំពុងតែធ្វើវិញ្ញាបនបត្រសម្គាល់អចលនវត្ថុ ឬប្លង់រឹង ដើម្បីធ្វើជាកម្មសិទ្ធិរបស់មន្ទីរ ហើយនៅពេលធ្វើវិញ្ញាបនបត្រនេះរួចរាល់ទូទាំងខេត្ត នោះនឹងលែងមានក្តីបារម្ភទៀតហើយ។
លោកបញ្ជាក់ថា “បច្ចុប្បន្នដើម្បីការពារគ្រប់រូបភាព យើងត្រូវតែធ្វើទៅតាមលទ្ធភាព ដែលយើងអាចធ្វើទៅបាន ទីមួយ គឺយើងចុះធ្វើនិយាមការ ដើម្បីកំណត់ទំហំទីទួលរបស់យើង ទីពីរ ត្រូវបោះបង្គោល ទីបី ធ្វើប្លង់រឹង គឺយើងធ្វើគ្រប់រូបភាព តាមលទ្ធភាពដែលយើងអាចធ្វើទៅបាន”។
បើតាមលោក ស៊ុន មានជ័យ មូលហេតុដែលស្ថានីយបុរាណនោះឈ្មោះអង្គសេះស្លាប់ គឺយកទៅតាមការនិយាយតគ្នារបស់អ្នកស្រុក ដោយធ្វើការសម្ភាសន៍ច្បាស់លាស់ ហើយធ្វើការផ្គូផ្គង និងចុងក្រោយទើបសម្រេចសន្និដ្ឋានកំណត់យកឈ្មោះអ្វីមួយ ហើយការដាក់ឈ្មោះទួលអង្គណាមួយ មិនមែនចេះតែកំណត់ថា ជាទីទួលបុរាណ ទួលកប់សព ភូមិបូរាណ ឬទួលអង្គបុរាណនោះទេ គឺមានច្បាប់ចង្អុលបង្ហាញ គឺច្បាប់ស្ដីពីការការពារបេតិកភណ្ឌ។
សូមបញ្ជាក់ថា រហូតមកដល់ឆ្នាំ២០២១នេះ នៅទូទាំងខេត្តកំពង់ស្ពឺ មានសម្បត្តិបេតិកភណ្ឌវប្បធម៌ជាតិជាច្រើនត្រូវបានរកឃើញ និងបានអភិរក្ស គឺមានរហូត៤៦៤កន្លែង ដែលក្នុងនោះមាន ទួលបុរាណ, ប្រាសាទ, ទីសក្ការៈបូជា, ស្រះបុរាណ, បឹងបុរាណ និងរមណីយដ្ឋានជាដើម នេះបើតាមការឲ្យដឹងពីលោក ស៊ុន មានជ័យ៕ (មានជ័យ)
