ភ្នំពេញ៖ ចោរឆក់កាបូបម្នាក់ ត្រូវបានសមត្ថកិច្ច នៃអធិការដ្ឋាននគរបាល ខណ្ឌពោធិ៍សែនជ័យ ស្រាវជ្រាវ រហូតឈានដល់ការឃាត់ខ្លួនបាន បន្ទាប់ពីគេចខ្លួនក្រោយធ្វើសកម្មភាពឆក់កាបូបរបស់ស្រ្តីម្នាក់បណ្តាលឱ្យដួល និងរងគ្រោះរហូតដល់បាត់បង់ជីវិត។

លោកវរសេនីយ៍ឯក ម៉ន វុធី អធិការដ្ឋាននគរបាល ខណ្ឌពោធិ៍សែនជ័យ បានឱ្យដឹថា បន្ទាប់ពីមានករណីជនសង្ស័យជិះម៉ូតូធ្វើសកម្មភាពឆក់កាបូបបណ្ដាលឱ្យស្ដ្រីម្នាក់ដួលស្លាប់បាត់បង់ជីវិតពេលដឹកដល់មន្ទីរពេទ្យ សមត្ថកិច្ចបានតាមស្រាវជ្រាវរកជនសង្ស័យ លុះដល់យប់ថ្ងៃទី ២៨ ឈានចូលថ្ងៃទី ២៩ ខែ មករា ឆ្នាំ២០២២ វេលាម៉ោង០១៖៤០នាទី រំលងអាធ្រាត្រ កម្លាំងនគរបាល នៃអធិការដ្ឋាននគរបាល ខណ្ឌពោធិ៍សែនជ័យ បានឃាត់ខ្លួនជនសង្ស័យឈ្មោះ ជុំ សុខបញ្ញា ភេទប្រុសអាយុ១៨ឆ្នាំ មុខរបរសិស្ស ស្នាក់នៅភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ។ 

សូមបញ្ជាក់ថា កាលពីវេលាម៉ោង១៣ និង៣០នាទីរសៀល ថ្ងៃទី ១៥ ខែ មករា ឆ្នាំ ២០២២ មានករណីឆក់កាបូបមួយបានកើតឡើង នៅតាមបណ្ដោយផ្លូវសហព័ន្ធរុស្ស៊ីក្នុងភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ ។

នៅក្នុងហេតុការនោះ បណ្តាលឱ្យជនរងគ្រោះឈ្មោះ អ៊ុក កន្និកា ភេទស្រីអាយុ ៤០ឆ្នាំ មុខរបរលក់ដូរ ស្នាក់នៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ បានរងរបួសធ្ងន់ និងបានស្លាប់ពេលបញ្ជូនដល់មន្ទីរពេទ្យ។ 

បច្ចុប្បន្នជនសង្ស័យត្រូវបានកម្លាំងនគរបាលជំនាញ សាកសួរដើម្បីកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់៕

អត្ថបទ៖លាង ឡា