ឡានហោះដែលមានសមត្ថភាពបើកក្នុងល្បឿនលើសពី 100mph (160kmh) និងកម្ពស់លើសពី 8,000ft (2,500m) ត្រូវបានចេញវិញ្ញាបនបត្រនៃភាពសក្តិសមតាមផ្លូវអាកាស (Airworthiness Certification) ដោយអាជ្ញាធរដឹកជញ្ជូនស្លូវ៉ាគី។ យន្តហោះកូនកាត់ AirCar ត្រូវបានបំពាក់ដោយម៉ាស៊ីន BMW និងដំណើរការដោយម៉ាស៊ីនបូមសាំងធម្មតា។ វាត្រូវចំណាយពេល ២ នាទី ១៥ វិនាទី ដើម្បីបំប្លែងពីរថយន្តទៅជាយន្តហោះ។
ក្រុមហ៊ុនបាននិយាយថា វិញ្ញាបនបត្រនេះបានអនុវត្តតាមការធ្វើតេស្តហោះហើររយៈពេល 70 ម៉ោង ទាំងការហោះហើរ និងការចុះចតជាង 200 ដង។ លោកសាស្រ្តាចារ្យ Stefan Klein ដែលជាអ្នកបង្កើតរបស់វាបាននិយាយថា "វិញ្ញាបនបត្ររបស់ AirCar បានបើកទ្វារសម្រាប់ការផលិតឡាន ដែលអាចហោះហើរដ៏មានប្រសិទ្ធភាព"។ "វាជាផ្លូវការ និងជាមានការបញ្ជាក់ចុងក្រោយនៃសមត្ថភាពរបស់យើងក្នុងការផ្លាស់ប្តូរការធ្វើដំណើរលើអាកាសជារៀងរហូត"។
'សុទិដ្ឋិនិយមដោយប្រុងប្រយ័ត្ន'
នៅក្នុងខែមិថុនា ឡានហោះនេះបានបញ្ចប់ការហោះហើររយៈពេល 35 នាទី រវាងអាកាសយានដ្ឋានអន្តរជាតិក្នុងទីក្រុង Nitra និង Bratislava ប្រទេសស្លូវ៉ាគី។ ក្រុមហ៊ុនបានប្រាប់ BBC News ថាខ្លួនគ្រោងនឹងហោះហើរទៅកាន់ទីក្រុងឡុងដ៍ ដែលចេញពីទីក្រុងប៉ារីសនាពេលខាងមុខនេះ។
លោកបណ្ឌិត Steve Wright អ្នកស្រាវជ្រាវជាន់ខ្ពស់ផ្នែកអាកាសចរណ៍ និងប្រព័ន្ធយន្តហោះនៅសាកលវិទ្យាល័យ West of England បាននិយាយថា ដំណឹងនេះគឺជា “ជំហានដ៏ល្អមួយសម្រាប់ក្រុមហ៊ុន” ហើយធ្វើឱ្យគាត់មានសុទិដ្ឋិនិយមដោយប្រុងប្រយ័ត្នថា ខ្ញុំនឹងឃើញ AirCars ពីរបីនៅក្នុងថ្ងៃណាមួយ។
ក្រុមហ៊ុនផ្សេងទៀតក៏កំពុងអភិវឌ្ឍយានជំនិះដែលអាចហោះបាន និងអាចបើកបរលើដងផ្លូវផងដែរ។ កង់បី PAL-V Liberty ដែលហោះហើរដូចម៉ាស៊ីន gyrocopter គឺស្របច្បាប់នៅអឺរ៉ុប និងធ្វើការឆ្ពោះទៅរកការទទួលបានវិញ្ញាបនបត្ររបស់ទីភ្នាក់ងារសុវត្ថិភាពអាកាសចរណ៍សហភាពអឺរ៉ុប (European Union Aviation Safety Agency)។
សេវាកម្មតាក់ស៊ីតាមអាកាស
ឡានហោះ AirCar អាចហោះឡើង ហើយចុះចតដូចយន្តហោះធម្មតា ហើយទាមទារអាជ្ញាប័ណ្ណពីអ្នកបើកបរយន្តហោះ ដើម្បីហោះហើរបាន។ ប៉ុន្តែក្រុមហ៊ុនមួយចំនួនកំពុងធ្វើការលើសេវាកម្មតាក់ស៊ីតាមផ្លូវអាកាស ជាមួយនឹងការហោះហើរដោយស្វ័យប្រវត្តិ ទាំងការចុះចត និងការហោះឡើង។
អ្នកផ្សព្វផ្សាយសង្ឃឹមថា ពួកគេនឹងក្លាយជាទម្រង់ដឹកជញ្ជូនដ៏ងាយស្រួល និងអាចបត់បែនបាន ហើយកំពុងទាក់ទាញការវិនិយោគសំខាន់ៗ។
កាលពីថ្ងៃច័ន្ទផងដែរ ក្រុមហ៊ុន Boeing បានប្រកាសថាខ្លួនកំពុងវិនិយោគបន្ថែម $450m ទៅក្នុង Wisk ដែលជាក្រុមហ៊ុនតាក់ស៊ីផ្លូវអាកាស ដែលមានមូលដ្ឋាននៅរដ្ឋ California កាន់កាប់ជាមួយ Kitty Hawk ដែលជាក្រុមហ៊ុនដែលបើកដំណើរការដោយសហស្ថាបនិក Google លោក Larry Page ៕
អត្ថបទដកស្រង់ពី BBC
បកប្រែនិងកែសម្រួលដោយ Mr. Blue