ថ្លែងក្នុងឳកាសចូលជួប​ជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីព្រឹកថ្ងៃព្រហស្បតិ៍ ទី២០ ខែមករា ឆ្នាំ២០២២នេះ​ ​លោក ប៊ូយ ថាញ់សឺន (Bui Thanh Son) ​រដ្ឋមន្ត្រីក្រសួងការបរទេសវៀតណាម បាន​ថ្លែងអំណ​គុណប្រមុខរាជរដ្ឋាភិបាល​កម្ពុជា ដែល​បានអនុញ្ញាតឱ្យមានការហោះហើរត្រង់ឡើងវិញ​ រវាងកម្ពុជា និងវៀតណាម និងទទួលស្គាល់ការធ្វើដំណើរឆ្លងដែន ដោយភ្ជាប់បណ្ណចាក់វ៉ាក់សាំង។​

ចំណែកសម្តេចតេជោ ក៏បានបង្ហាញភាពរីករាយ ដែលបានឃើញការហោះហើរត្រង់រវាងកម្ពុជា និងវៀតណាម ដើម្បីសម្រួលការធ្វើដំណើររវាងប្រជាជនប្រទេសទាំងពីរ។​ នេះបើ​តាមការ​បញ្ជាក់ពី​លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី ដែលបានថ្លែងប្រាប់អ្នកសារ​ព័ត៌មានក្រោយជំនួប។

​បើតាមលោក កៅ គឹមហួន​​ នៅ​ក្នុងជំនួបនោះ លោក Bui Thanh Son ​បានបង្ហាញការកោតសរសើរ និងស្ញប់ស្ញែងយ៉ាងជ្រាលជ្រៅជូនចំពោះសម្តេចតេជោ សម្រាប់ការរីកចម្រើនរបស់កម្ពុជា​ប្រកប​ដោយភាពឆាប់​រហ័ស។ សម្រាប់​លោក ប៊ូយ ថាញ់សឺន ភាព​រីកចម្រើន​របស់​កម្ពុជា គឺបានកើតចេញពីការដឹក​នាំប្រក​បដោយភាពប៉ិនប្រសប់របស់សម្តេចតេជោ។​​​​​

សូមបញ្ជាក់ថា កម្ពុជា និងវៀតណាម បានភ្ជាប់ទំនាក់ទំនង​កាទូតនៅថ្ងៃទី២៤ ខែមិថុនា ឆ្នាំ១៩៦៧ តែទំនាក់ទំនងនេះ​ ត្រូវបាត់កាត់ផ្តាច់ទៅវិញនៅខែមីនា ឆ្នាំ១៩៧០។ ខែមករា ឆ្នាំ១៩៧៩ ក្រោយពេលប្រទេសកម្ពុជា រំដោះចេញពីរបបប្រល័យពូជសាសន៍ប៉ុល ពត ទំនាក់ទំនងរវាងកម្ពុជា និងវៀតណាម ក៏បានតភ្ជាប់ឡើងវិញ។ នៅខែមីនា ឆ្នាំ២០០៥ ទំនាក់ទំនងប្រទេសទាំងពីរ ត្រូវបានដំឡើងកម្រិតទៅជា “ទំនាក់ទំនងមិត្តភាពជិតខាងល្អជាប្រពៃណី និងប្រកបដោយសហប្រតិបត្តិការរឹងមាំ យូរអង្វែង និងគ្រប់វិស័យ”។ កម្ពុជា និងវៀតណាម មានព្រំដែនគោកសរុបប្រវែង​១,២៧០គីឡូម៉ែត្រ បោះបង្គោលព្រំដែនបាន ៨៤ភាគរយ ស្មើនឹងព្រំដែនប្រវែង ១,០៤៥គីឡូម៉ែត្រ។

តាមរយៈទំនាក់ទំនងល្អប្រសើរនឹងគ្នានេះ មេដឹកនាំកម្ពុជា និងមេដឹកនាំរបស់វៀតណាម តែងបានផ្លាស់ប្តូរដំណើររវាងគ្នាជាញឹកញាប់។ ឈរលើកិច្ចសហប្រតិបត្តិការល្អនេះ កម្ពុជា និងវៀតណាម តែងបានជួយឧបត្ថម្ភគាំទ្រគ្នាទៅវិញទៅមកលើការលំបាកនានា។ ជាពិសេសនៅក្នុងពេលរាតត្បាតជំងឺកូវីដ១៩ ប្រទេសទាំងពីរបានគាំទ្រគ្នាទៅវិញទៅមកលើការប្រយុទ្ធប្រឆាំងនឹងជំងឺកូវីដ១៩នេះ។

ការធ្វើពាណិជ្ជកម្ម និងវិនិយោគ ក៏ជាកិច្ចការអាទិភាពមួយដែលរាជរដ្ឋាភិបាលកម្ពុជា និងរដ្ឋាភិបាលវៀតណាម យកចិត្តទុកដាក់ខ្ពស់ ហើយតែងបានប្តេជ្ញាចិត្តក្នុងការជំរុញការធ្វើពាណិជ្ជកម្ម និងបង្កើតការវិនិយោគរវាងប្រទេសទាំងពីរ។ ក្នុងនោះនៅឆ្នាំ២០២០ ការធ្វើពាណិជ្ជកម្មរវាងប្រទេសទាំងពីរសម្រេចបានជាង ៥ប៊ីលានដុល្លារ ហើយរយៈពេល៨ខែឆ្នាំ២០២១ សម្រេចបានជិត ៧ប៊ីលានដុល្លារ។

ដោយឡែកការវិនិយោគវិញ គិតចាប់ពីឆ្នាំ១៩៩៤ ដល់ខែកញ្ញា ឆ្នាំ២០២១ ការវិនិយោគរបស់វៀតណាមនៅកម្ពុជា មានចំនួន​​៨៨គម្រោង ក្នុងទំហំដើមទុនប្រមាណ​២.៥៦ប៊ីលានដុល្លារ។ សម្រាប់រយៈពេល​១០ខែឆ្នាំ២០២១ ការវិនិយោគរបស់វៀតណាម​នៅកម្ពុជា មានទឹកប្រាក់ប្រមាណ​៨៩.៤ លានដុល្លារអាមេរិក៕ (មានជ័យ) ​