Thestraithtimes-

ទោះបីជាការប៉ុនប៉ងត្រូវបរាជ័យដើម្បីដោះស្រាយវិបត្តិ ដែលកំពុងតែតានតឹងរវាងរុស្សី, អ៊ុយក្រែននិង NATO, ក្រុមអ្នកចរចាររុស្សីនិង NATO បានស្នើរឲ្យមានឱកាសដោយបើកចំហរនូវលទ្ធភាពក្នុងការជជែកនាពេលអនាគត លើការត្រួតពិនិត្យសព្វាវុធ ការដាក់ពង្រាយមីស៊ីល និងមធ្យោបាយជាច្រើនក្នុងការការពារនូវឧប្បទ្ទវហេតុយោធារវាងរុស្សី និងបស្ចឹមប្រទេស។ នេះវាគ្រាន់តែជាផាសុកដ៏តូចមួយ ទោះជាយ៉ាងណាក៏ដោយ នៅពេលដែលកំលាំងនៃការរុញច្រានដែលកំពុងតែបន្តលើរឿងអ៊ុយក្រែនវាហាក់ ដូចជាកំពុងរអិលទៅមុខទៅកាន់សេណារីយ៉ូមួយដែលមិនអាចត្រួតត្រាបាន។

ខណៈដែលទាំងសងខាងកំពុងជាប់ផុងក្នុងការសង្ស័យគ្នាទៅវិញទៅមក វាជារឿងល្អដែលរុស្សីបានបង្ហាញពីជំហររបស់ខ្លួនច្បាស់លាស់ ដែលអ្នកនាំពាក្យវិមានក្រឹមឡាំង Dmytry peskov បាននិយាយកាលពីថ្ងៃអាទិត្យថា “រុស្សីមិនបានពិចារណាពីសកម្មភាពយោធានោះទេ ទោះបីជាការចរចារជាមួយនឹងសហរដ្ឋអាមេរិកនិង NATO ពីការធានាចំពោះសន្តិសុខត្រូវបរាជ័យ” ក៏ដោយ។ រហូតមកដល់ពេលនេះ ភាគីទាំងសងខាងបានគូសបន្ទាត់របស់គេច្បាស់លាស់។ ហើយភាគីនិមួយៗបានបដិសេធនូវគំនិតគ្នាទៅវិញទៅមក និងបានចោទប្រកាន់ម្ខាងៗថាជា អ្នកឈ្លានពាន ដូច្នេះមហន្តរាយបានទុំជោរហើយ។

សំរាប់អាមេរិកនិង NATO បានចោទរុស្សីថារៀបគំរោងប្រតិបត្តិការក្លែងបន្លំទង់នៅអ៊ុយក្រែនខាងកើត ដើម្បីធ្វើការឈ្លានពានជាទ្រង់ទ្រាយធំ បន្ទាប់ពីឆ្នាំ២០១៤។ ពួកគេបានទាមទារឲ្យកងទ័ពរុស្សីដែលកំពុងដាក់ពង្រាយនៅជិតព្រំប្រទល់អ៊ុយក្រែនត្រូវតែដកចេញ។ ទោះជាយ៉ាងណាក៏ដោយ Peskov បាននិយាយថា “ស្ថានការណ៍ដែលកំពុងតែតឹងតែងនិងបរិយាកាសអមិត្ត” ធ្វើឲ្យវត្តមានរបស់កងទ័ពនៅទីនោះមានសារៈសំខាន់ណាស់។

ទន្ទឹមគ្នានេះដែរ ការទាមទារជាគន្លឹះរបស់រុស្សីទាំង២លក្ខ័ណ សំរាប់បន្ថយចំនួនកងទ័ពនៅតាមព្រំប្រទល់អ៊ុយក្រែន-រុស្សី និងសំរាប់ NATO ឲ្យបញ្ឈប់នូវការបញ្ចូលសមាជិកភាពថ្មី ត្រូវបានពិពណ៌នាយ៉ាងសាមញ្ញថាជាការខ្ជះខ្ជាយពេលវេលា ដែលជាពាក្យសំដីរបស់អនុរដ្ឋមន្ត្រីក្រសួងការបរទេសសហរដ្ឋអាមេរិក Wendy Sherman ។ ដូច្នេះទាំងសងខាងបានមើលឃើញថា ពួកគេបានចូលទៅដល់ចំណុចទាល់ច្រក ដោយគ្មានខាងណាចង់បង្ហាញថា ខ្លួនខ្សោយហើយថយក្រោយមួយជំហ៊ាននោះទេ។

“បើសិនជា NATO ជ្រើសរើសយកនយោបាយរុកគួន យើងនឹងឆ្លើយតបដោយនយោបាយប្រឆាំងនឹងការរុកគួន ហើយបើសិនជាផ្តូរទៅជានយោបាយគំរាមកំហែង យើងនឹងឆ្លើយតបដោយការប្រឆាំងទៅនឹងការគំរាមកំហែង បើសិនជាអ្នកស្វែងរកមើលចំណុចខ្សោយនៅក្នុងប្រព័ន្ធការពាររបស់រុស្សី យើងនឹងស្វែងរកមើលចំណុចខ្សោយរបស់ NATO វាមិនមែនជាជំរើសរបស់យើងទេ ប៉ុន្តែយើងគ្មានជំរើសផ្សេងទៀត។ អនុរដ្ឋមន្ត្រីក្រសួងការបរទេសរុស្សី Alexander Grushoបានឆ្លើយតបទៅនឹងការបដិសេធរបស់ NATO ៕