ផ្លែបឺរគឺជាអាហារបំប៉នសុខភាព និងសម្បូរសារធាតុចិញ្ចឹម ដែលភ្ជាប់ទៅនឹងអត្ថប្រយោជន៍សុខភាពសំខាន់ៗមួយចំនួន។ វាសំបូរទៅដោយ fiber និងសារធាតុចិញ្ចឹម ផ្លែបឺរអាចជួយសម្រួលដល់ការរំលាយអាហារ កាត់បន្ថយកូឡេស្តេរ៉ុល និងកាត់បន្ថយហានិភ័យនៃជំងឺបេះដូង។ ប៉ុន្តែតើអ្នកអាចញ៉ាំរបស់ល្អច្រើនពេកទេ? ដូចទៅនឹងអាហារដទៃទៀត យកល្អគួរតែញ៉ាំផ្លែបឺរក្នុងកម្រិតមធ្យម (តាមរយៈ Health)។ ទោះបីជាផ្លែបឺរសម្បូរទៅដោយវីតាមីន Fiber និងខ្លាញ់ដែលមានសុខភាពល្អក៏ដោយ ពួកវាក៏មានកាឡូរីខ្ពស់ផងដែរ។ ផ្លែបឺរមួយអាចផ្ទុកពី 250 ទៅ 320 កាឡូរីអាស្រ័យលើទំហំរបស់វា។ នោះគឺជា 10% ទៅ 20% នៃបរិមាណកាឡូរី ដែលបានណែនាំឲ្យបរិភោគប្រចាំថ្ងៃរបស់អ្នក។ ផ្លែបឺរក៏មានផ្ទុកជាតិខ្លាញ់ច្រើនជាង 20ក្រាមផងដែរ។ ការទទួលទានជាតិខ្លាញ់ដែលបានណែនាំប្រចាំថ្ងៃគឺពី 44 ទៅ 77 ក្រាមក្នុងមួយថ្ងៃ ហើយការទទួលទានជាតិខ្លាញ់ច្រើនពេក អាចរួមចំណែកដល់ការឡើងទម្ងន់។ វាត្រូវបានគេនិយាយថា ការទទួលទានផ្លែបឺរមួយភាគបី ឬ សូម្បីតែមួយទាំងមូលជារៀងរាល់ថ្ងៃ គឺមានសុខភាពល្អ និងមានសុវត្ថិភាព។
ហានិភ័យនៃការញ៉ាំផ្លែបឺរច្រើនពេក
ទោះបីជាវាមិនមានជាតិពុល ឬបង្កគ្រោះថ្នាក់ដល់សុខភាពរបស់អ្នកក៏ដោយ ការទទួលទានផ្លែបឺរច្រើនពេក អាចបណ្តាលឱ្យមានផលប៉ះពាល់មិនល្អមួយចំនួន។ ដោយសារផ្លែបឺរ គឺជាផ្លែឈើដែលមានជាតិខ្លាញ់ខ្ពស់ និងកាឡូរីខ្ពស់ ការទទួលទានបរិមាណលើស អាចបណ្តាលឱ្យអ្នកឡើងទម្ងន់ អាស្រ័យលើរបបអាហារ និងកម្រិតសកម្មភាពរបស់អ្នកបានដែរ (តាមរយៈ Eat This, Not That)។ ការកំណត់ខ្លួនឯងក្នុងការបរិភោគផ្លែបឺរមិនឲ្យលើសពីមួយក្នុងមួយថ្ងៃ អាចជួយការពារការឡើងទម្ងន់ ដែលមិនចង់បាន។ ការញ៉ាំផ្លែបឺរច្រើនពេកក៏អាចបង្កបញ្ហាដល់ក្រពះពោះវៀនដែរ។ ថ្វីត្បិតតែផ្លែបឺរសម្បូរទៅដោយ Fiber ដែលអាចជួយដល់ការរំលាយអាហារ ប៉ុន្តែពួកវាក៏មានផ្ទុកសារធាតុ polyols ផងដែរ។ សារធាតុ Polyols គឺជាកាបូអ៊ីដ្រាតខ្សែសង្វាក់តូច ដែលអាចបណ្តាលឱ្យហើមពោះ រាគ និងឈឺក្រពះ នៅពេលទទួលទានក្នុងបរិមាណច្រើន។ មនុស្សមួយចំនួនដែលមិនអាចបរិភោគអាហារដែលមានសារធាតុ polyols អាចជួបប្រទះនូវរោគសញ្ញាទាំងនេះ បន្ទាប់ពីទទួលទានផ្លែបឺរច្រើនពេក។ មធ្យោបាយដ៏ល្អបំផុត ដើម្បីជៀសវាងផលប៉ះពាល់ទាំងនេះ គឺការទទួលទានផ្លែបឺរក្នុងកម្រិតមធ្យម រួមជាមួយនឹងរបបអាហារដែលមានសុខភាពល្អ និងមានតុល្យភាព៕