ហ្សាការតា៖ ក្រសួងថាមពល និងរ៉ែរបស់ឥណ្ឌូនេស៊ី (ESDM) បានកំណត់គោលដៅផលិតធ្យូងថ្មចំនួន ៦៦៣លានតោនក្នុងឆ្នាំ ២០២២នេះ កើនឡើង ៧,៩ភាគរយ ធៀបនឹងឆ្នាំមុន ដោយសាររដ្ឋាភិបាលបន្តកែសម្រួលគោលនយោបាយទាក់ទងនឹងការហាមឃាត់ការនាំចេញធ្យូងថ្មនៅដើមខែមករា។
រដ្ឋមន្ត្រីក្រសួងថាមពល និងរ៉ែ របស់ឥណ្ឌនេស៊ី លោក Arifin Tasrifi បាននិយាយនៅក្នុងសន្និសីទសង្ខេបស្តីពីការអនុវត្ត ESDM ក្នុងឆ្នាំ ២០២១ នៅក្នុងសប្តាហ៍នេះថា ប្រទេសនេះបានកំណត់គោលដៅនៃការទាញយកធ្យូងថ្មចំនួន ៦៦៣លានតោននៅឆ្នាំ ២០២២។
ក្នុងនោះ ១៦៥,៧លានតោនសម្រាប់ប្រើប្រាស់ក្នុងស្រុក ហើយសល់សម្រាប់នាំចេញ។ វាមានន័យថា គោលដៅនាំចេញធ្យូងថ្ម ក្នុងឆ្នាំ ២០២២ ក៏កើនឡើង ១៤,៣ភាគរយ បើធៀបនឹង ៤៣៥លានតោន ដែលបានកំណត់ក្នុងឆ្នាំ ២០២១។ ការផលិតធ្យូងថ្មរបស់ប្រទេសឥណ្ឌូនេស៊ីឈានដល់ ៩៨,២៤ភាគរយនៃគោលដៅដែលបានកំណត់ ៦២៥លានតោនក្នុងឆ្នាំ ២០២១ ស្មើនឹង ៦១៤លានតោន។
អគ្គនាយកដ្ឋានរ៉ែ និងធ្យូងថ្មរបស់ឥណ្ឌូនេស៊ី លោក Ridwan Djamaluddin បាននិយាយថា នៅឆ្នាំ ២០២១ មានតែ ១៥ភាគរយប៉ុណ្ណោះ ក្នុងចំណោមក្រុមហ៊ុនធ្យូងថ្មក្នុងស្រុកចំនួន ៦៣៤ ដែលបានបំពេញកាតព្វកិច្ចផ្គត់ផ្គង់ធ្យូងថ្មទៅកាន់ទីផ្សារក្នុងស្រុកដើម្បីបម្រើដល់ការផលិតថាមពល និងឧស្សាហកម្ម។ លោក Ridwan បានស្នើឱ្យក្រុមហ៊ុនធ្យូងថ្មកែលម្អគោលនយោបាយរបស់ពួកគេ និងបង្កើនការទទួលខុសត្រូវរបស់ពួកគេចំពោះប្រទេស៕
