ភ្នំពេញ៖ រដ្ឋាភិបាលប្រទេសអូស្ត្រាលី បានបង្ហាញនូវទំនាក់ទំនងដ៏រឹងមាំជាមួយរាជរដ្ឋាភិបាលកម្ពុជា ហើយរំពឹងថា ទំនាក់ទំនងនេះ នឹងកាន់តែរីកចម្រើន នាថ្ងៃអនាគត។នាឱកាសប្រារព្ធខួបលើកទី៧០ នៃទំនាក់ទំនងការទូតរវាងអូស្ត្រាលី និងកម្ពុជា លោក Scott Morrison នាយករដ្ឋមន្រ្តីអូស្រ្តាលី បានលើកឡើងថា ទំនាក់ទំនងការទូតនេះ បានឆ្លុះបញ្ចាំងពីទំនាក់ទំនងដ៏យូរអង្វែងរវាងប្រជាជាតិទាំងពីរ ។

លោកបន្តថា ចាប់តាំងពីឆ្នាំ ១៩៥២មក អូស្ត្រាលី ជាអ្នកគាំទ្រសន្តិភាព និងការអភិវឌ្ឍនៅកម្ពុជា និងនៅចុងទសវត្សរ៍ឆ្នាំ ១៩៨០ អូស្ត្រាលី បានជួយបំបែកភាពជាប់គាំងក្នុងដំណើរការសន្តិភាពកម្ពុជា តាមរយៈកិច្ចព្រមព្រៀងសន្តិភាពទីក្រុងប៉ារីសឆ្នាំ ១៩៩១ ។​លោក Scott Morrison បានអបអរសាទរចំពោះកម្ពុជា ដែលធ្វើជាប្រធានអាស៊ាន នាឆ្នាំ ២០២២។

លោកនាយករដ្ឋមន្រ្តី បន្តលើកឡើងថា អូស្រ្តាលី ឈរជាមួយកម្ពុជា ក្នុងការប្រឈមមុខនឹងបញ្ហាកូវីដ-១៩ ដែលមិនធ្លាប់មានពីមុនមក។  ការស្តារឡើងវិញ និងការបន្ធូរបន្ថយផលប៉ះពាល់ នៃជំងឺរាតត្បាតលើមនុស្ស និងសេដ្ឋកិច្ច គឺជាគោលដៅបន្ទាន់ដែល អូស្ត្រាលី កំពុងផ្តល់ជំនួយផ្នែកហិរញ្ញវត្ថុ និងសម្ភារយ៉ាងសកម្ម។

សូមបញ្ជាក់ថា កាលពីឆ្នាំ២០២០ ទំហំពាណិជ្ជកម្មរវាងប្រទេសកម្ពុជា និងអូស្រ្តាលី មានតម្លៃ ៤៣២.៤លានដុល្លារ កើនឡើង ២១.៦ភាគរយ ធៀបនឹងឆ្នាំ២០១៩។ ក្នុងឆ្នាំ២០២០ដែរ ប្រទេស អូស្រ្តាលី នាំចូលមកកម្ពុជា មានទំហំសរុប ១២១.៤លានដុល្លារ ឬប្រមាណ ៤៣.៥ភាគរយ ធៀបនឹងឆ្នាំ២០១៩៕